ऊर्जा खबर
काठमाडौँ । रामेछापमा निर्माणाधीन ५७.५ मेगावाटको नुप्चे लिखु जलविद्युत् आयोजनाको निर्माण करिब ८० प्रतिशत सकिएको छ । भिजन इनर्जी एण्ड पावर लिले प्रवर्द्धन गरेको आयोजनालाई असोज ११ र १२ गते भएको भीषण वर्षा र बाढी पहिरोले पनि तथा असर नगरेको कम्पनीले जनाएको छ । धमाधम निर्माण कार्य भइरहेकाले आयोजनाको व्यापारिक विद्युत् उत्पादन मिति (आरसीओडी) लाई कुनै असर नगर्ने कम्पनीको भनाइ छ । २०७८ असोज १२ गतेदेखि आयोजनाको निर्माण शुरू भएको थियो ।
आयोजनाको केही खण्डमा पहुँचमार्ग, इन्टरनेट सेवा र निर्माणका लागि विद्युत् शक्ति केही प्रभावित भएको तरप्राकृतिक प्रकोपबाट आयोजनालाई सुरक्षित राख्न यस कम्पनीले सुरक्षाका सम्पूर्ण तयारी गरेको हुँदा आयोजनाको संरचनामा उल्लेख्य क्षति नभएको कम्पनीले जनाएको हो ।
यो आयोजना रामेछापको उच्च हिमाली क्षेत्रमा निर्माणाधीन छ । नुप्चे र लिखु खोलामा अलग–अलग बाँध निर्माण गरी दुई वटा सुरुङ खनेर ल्याइएको पानी एकै विन्दुमा मिसार्इ विद्युत् उत्पादन गर्ने गरी आयोजनाको काम भइरहेको छ ।
उच्च हिमाली क्षेत्रमा निर्माणाधीन आयोजनाको बाँध समुद्र सतहदेखि ३३४० मिटर उचाइमा र विद्युत्गृह करिब २६०० मिटरमा निर्माण भइरहेको छ ।
हिमाल पानीको स्रोत भएकाले आयोजनाबाट वार्षिक ३८१ गिगावाट प्रतिघन्टा ऊर्जा (३८ करोड १० लाख युनिट) उत्पादन हुने अध्ययनले देखाएको छ । क्यू–४५ मा डिजाइन गरिएको यो आयोजनाबाट पहिलो वर्ष २ अर्ब ३५ करोड रुपैयाँ आम्दानी हुने प्रक्षेपण गरिएको छ । उत्पादित विद्युत् विद्युत्गृहदेखि २४ किलोमिटर दूरीको गर्जाङ सबस्टेसनमा जोडिने छ ।
१० अर्ब ५७ करोड ८० लाख रुपैयाँ लागत अनुमान गरिएको आयोजनामा ७५ प्रतिशत ऋण र २५ प्रतिशत स्वपुँजी लगानी छ । नुप्चे–लिखुमा माछापुच्छ्रे बैंकको नेतृत्व तथा हिमालयन बैंकको सह–नेतृत्वमा बैंक अफ काठमाडौं, राष्ट्रिय वाणिज्य, कुमारी, कृषि विकास, एनसिसी लगायत ९ बैंकले लगानी गरेका छन् ।
आयोजनामा हाइड्रो इलेक्ट्रिसिटी इन्भेष्टमेन्ट एन्ड डेभलपमेन्ट कम्पनी लिमिटेड (एचआइडिसिएल) ले ५० करोड रुपैयाँ स्वपुँजी लगानी गरेको छ । निजी क्षेत्रले निर्माण गर्ने आयोजनामा सरकारी कम्पनीले स्वपुँजी लगानी गरेको यो पहिलो आयोजना हो ।
