ऊर्जा खबर
काठमाडौं । केही दिनदेखि परिरहेकाे लगातारकाे झरीका कारण आएको बाढी पहिरोले विद्युतीय संरचनामा क्षति पुग्दा तनहुँका ८ हजार घरधुरीकाे विद्युत सेवा अवरुद्ध हुन पुगेकाे छ । वर्षासँगैकाे बाढी र पहिराेले वितरण लाइनका पाेल ढलेकाले विद्युत सेवा अवरुद्ध हुन पुगेकाे हाे।
भारी वर्षाले वितरण लाइनको २८ वटा पोलमा क्षति पुगेको नेपाल विद्युत प्राधिकरण तनहुँ वितरण केन्द्र प्रमुख सोभितबहादुर क्षेत्रीले बताए । ‘लगातार वर्षा हुँदा जमिन गिलो भई धेरै पोल ढलेका छन् । केही बाढीमा बगेका पनि छन् ’ उनले ऊर्जाखबरसँग भने, ‘क्षतिग्रस्त संरचनाकाे मर्मत गरी विद्युत सेवा सुचारु गर्न ३/४ दिनकाे समय लाग्ने देखिन्छ।’
निरन्तरकाे झरीले व्यास नगरपालिकाका १३ वटा पोलमा क्षति पुर्याएको छ । वोटेगाउँमा एउटा, छाब्दीमा ४ वटा , देउराली, छिकर्ने र जौवारीमा ८ वटा पोलमा क्षति पुगेको पनि क्षेत्रीले बताए ।
यस्तै, भानु गाउँपालिकामा ११ पोलमा क्षति पुगेको छ । साँझबोटेमा ४ वटा, तुरतुरेमा ३ वटा, वरभन्ज्याङमा २ वटा र पोखरीछापमा एउटा पोलमा क्षति पुगेकाे उनले जानकारी दिए । बन्दिपुर गाउँपालिकाको भैसेखारमा पनि ४ वटा पोल ढलेका छन् ।
क्षतिग्रस्त संरचनाकाे मर्मत गरी विद्युत सेवा सुचारु गर्न प्राविधिकहरु खटिएकाे क्षेत्रीले बताए । यस वितरण केन्द्र अन्तर्गत करिब ३९ हजार ग्राहकले विद्युत सेवा लिँदै आएका छन् ।
.jpg)
