ऊर्जा खबर
.jpg)
काठमाडौं । भारतीय आयल कर्पोरेशन (आइओसी) ले मूल्य घटाएर पठाएपछि नेपाल आयल निगम (एनओसी) ले पनि पेट्रोलियम पदार्थको मूल्य घटाएको छ । आज सोमबार बसेको निगम सञ्चालक समितिको बैठकले पेट्रोलमा प्रतिलिटर ३ रुपैयाँ, डिजेलमा प्रतिलिटर १० रुपैयाँ तथा मट्टितेलमा प्रतिलिटर १० रुपैयाँ घटाउने निर्णय गरेको हो ।
घटेको मूल्य सोमबार राति १२ बजेपछि लागू हुनेछ । हवाई इन्धन आन्तरिकतर्फ प्रतिलिटर १० रुपैयाँ, अन्तर्राष्ट्रियतर्फ प्रतिलिटर १० रुपैयाँ घटाउने निर्णय गरेको निगमले जनाएको छ । नयाँ मूल्यसूची अनुसार अब पेट्रोलको खुद्रा बिक्री मूल्य प्रतिलिटर १७५ रुपैयाँ कायम हुने भएको छ । यस्तै, डिजेल र मट्टितेलको खुद्रा बिक्री मूल्य प्रतिलिटर १६५ रुपैयाँ पर्नेछ ।
आइओसीले अप्रिल १ तारिखमा एनओसीलाई नयाँ मूल्यसूची पठाएको थियो । जसअनुसार पेट्रोलमा प्रतिलिटर १.८६ रुपैयाँ, र डिजेलमा ६.८२ रुपैयाँ घटेर आएको थियो । आइओसीले गत मार्च १५ तारिखमा पठाएको मूल्यअनुसार पेट्रोलमा ८६ पैसा र डिजेलमा १.५० रुपैयाँ घटेर आएको थियो । आइओसीको बक्यौता र सरकारी ऋणसहित अहिले पनि करिब १४ अर्ब दायित्व रहेको जनाइएको छ ।
