ऊर्जा खबर
काठमाडौँ । भारत र पाकिस्तानबीच जारी युद्धका कारण नेपालमा पेट्रोलियम पदार्थको आपूर्ति असहज हुने हो कि भन्ने आशंका बढिरहँदा इन्डियन आयल कर्पोरेशन (आइओसी) ले नअत्तालिन आग्रह गरेको छ । आइओसीले सामाजिक सञ्जाल एक्सको आफ्नो एकाउन्टमार्फत यस्तो आग्रह गरेको हो ।
उसले भनेको छ, ‘देशभर (भारतमा) पेट्रोल डिजेल तथा एलपिजीको उपलब्धता पर्याप्त छ । हाम्रो आपूर्ति शृङ्खला सुचारु रुपले चलिरहेको छ । सबै खुद्रा वितरण केन्द्रहरुमा इन्धन तथा एलपिजी सहज रूपमा उपलब्ध छ ।’
उसले अत्तालिएर थप भण्डारण गर्ने मनसायले इन्धन नकिन्न पनि उपभोक्तालाई आग्रह गरेको छ । ‘आत्तिएर अतिरिक्त इन्धनको खरिदबाट बच्नुहोस्,’ आइओसीले भनेको छ, ‘अनावश्यक भीडबाट बच्नुका साथै शान्त भई पेट्रोलियम खरिद गर्नुहोस् ।’
नेपालमा पनि भारतबाटै पेट्रोलियम इन्धन आयात हुने गरेको छ । नेपाल आयल निगम (एनओसी) ले आइओसीबाट इन्धन आयात गर्दै आएको छ । भारतमा अभाव भएको अवस्थामा त्यसको असर नेपालमा समेत पर्न सक्ने देखिएको छ ।
