ऊर्जा खबर
काठमाडौं । बजारमा आउन लागेका नयाँ इन्जिनियरहरूलाई इन्टर्नसिपसहित रोजगारीको व्यवस्था मिलाउने गरी कस्मिक इलेक्ट्रिकल इन्जिनियरिङ एसोसियट प्रालि र काठमाडौं इन्जिनियरिङ कलेज (केईसी) बीच आज (फागुन १८ गते) एक आपसमा समझदारी भएको छ ।
समझदारी अनुसार केईसीमा इन्जिनियरिङ चौथो वर्षको पढाई पूरा गरेर नतिजा कुरिरहेका विद्यार्थीहरूलाई कस्मिक इन्जिनियरिङले पेड इन्टर्नसिपको व्यवस्था मिलाइने छ । विद्यार्थीहरूको कार्यसम्पादन र कम्पनीको आवश्यकताका आधारमा नियुक्ति समेत गर्ने समझदारी भएको छ ।
इलेक्ट्रिकल इन्जिनियरिङ क्षेत्रको करियरको अवसर र क्षेत्रगत ज्ञान अभाव भएको हुँदा केईसीमा इलेक्ट्रिकल इन्जिनियरिङ अध्ययन गर्ने विद्यार्थीको चाप कम हुँदै गएको बताइएको छ । यही कारण बजारमा यस विधाका इन्जिनियरिङहरूको अभाव महसुस गरिएको छ ।
यस खालको अभाव परिपूर्ति गर्न र इलेक्ट्रिकल इन्जिनियरहरूको माग बढाउन यस समझदारीले सहयोग पुर्याउने अपेक्षा गरिएको छ । यस क्षेत्रको कार्यक्षेत्र विस्तार गर्दै नयाँ इन्जिनियरहरूले शिक्षा र वास्तविक कामको अन्तर बुझ्न सकून् भन्ने उद्देश्यले समझदारी गरिएको कम्पनीले जानकारी दिएको छ ।
