ऊर्जा खबर
काठमाडौं । बलेफी हाइड्रो पावर कम्पनीले आगामी २७ गतेदेखि साधारण सेयर निष्कासन गर्ने भएको छ । कम्पनीले निर्माण सम्पन्न ३६ मेगावाटको माथिल्लो बलेफी ‘ए’ जलविद्युत आयोजनाको प्रभावित स्थानीयका लागि छुट्याएको साधारण सेयर निष्कासन गर्न लागेको हो ।
सय रुपैयाँमा अंकित १८ करोड २७ लाख ९७ हजार रुपैयाँ बराबरको १८ लाख २७ हजार ९ सय ७० कित्ता सेयर निष्कासन गर्ने तयारी गरेको कम्पनीले जनाएको छ । कम्पनीका अनुसार निष्कासन हुने सेयरमध्ये ६० प्रतिशत अर्थात १० लाख ९६ हजार ७ सय ८२ कित्ता जुगल गाउँपालिका वडा नम्बर २, ३ र ४ (साविकको गोल्चे गाविस, गुम्बा गाविस र पाङताङ गाविस) छुट्याइएको छ ।
यस्तै, आयोजनाको १३२ केभि प्रशारण लाइनबाट प्रभावित जुगल गाउँपालिकाको वडा नम्बर ५ र ७, बलेफी गाउँपालिकाको बडा नम्बर १, ३, ६ र ७, सुनकोशी गाउँपालिकाको वडा नम्बर ७ का लागि ४० प्रतिशत अर्थात ७ लाख ३१ हजार १ सय ८८ कित्ता सेयर निष्कासन गर्न लागिएको कम्पनीले जनाएको छ ।
लगानीकर्ताले न्युनतम १० कित्तादेखि अधिकतम १ लाख कित्तासम्म आवेदन दिन पाउनेछन् । स्थानीयले छिटोमा फागुन १२ गतेसम्म र ढिलोमा फागुन २७ गतेसम्म आवेदन दिन सक्नेछन् ।
कम्पनीले पहिलो चरणमा आयोजना प्रभावित क्षेत्रका स्थानीयबासी र दोस्रो चरणमा सर्वसाधारणका लागि सेयर निष्कासन गर्ने तयारी गरेको छ ।
कम्पनीले सर्वसाधारणका लागि जारी गर्न लागेको सेयर स्वपुँजी लगानीको २० प्रतिशत हो । कम्पनीको सेयर निष्कासन गर्न ग्लोबल आइएमई क्यापिटललाई बिक्री प्रबन्धक तोकिएको छ । स्थानीयले कुमारी बैकको जलबिरे शाखा, एनसीसी बैंकको बोडे शाखा, ग्लोबल आईएमई बैंकको चौतारा शाखा, लक्ष्मी बैंकको चौतारा शाखा र खाडिचौर शाखाबाट आवेदन दिन सक्नेछन् ।
कम्पनीले सिन्धुपाल्चोकमा निर्माण गरेको आयोजना निर्माण सम्पन्न भई अहिले परीक्षणको चरणमा छ । ३० प्रतिशत स्वपुँजी र ७० प्रतिशत ऋण लगानी रहेको आयोजना ७ अर्ब रुपैयाँ लागतमा निर्माण सम्पन्न भएको छ ।
.jpg)
