ग्रीन भेन्चर्सको सेयर बाँडफाँड, २ लाख ८७ हजार ५ सयले पाए १० कित्ता 

काठमाडौं । ग्रीन भेन्चर्स लिमिटेडको सेयर बाँडफाँड भएको छ । रामेछापमा निर्माण सम्पन्न ५२.४ मेगावाट लिखु–४ जलविद्युत आयोजनाको सर्वसाधाणका लागि निष्कासन गरिएको सेयर बाँडफाँड भएको हो । 

कम्पनीको सेयरधनी बन्न आवेदन दिएको मध्ये २ लाख ८७ हजार ५ सयले मात्र गोलाप्रथाबाट १० कित्ता सेयर पाएको बिक्री प्रबन्धक लक्ष्मी क्यापिटल मार्केट लिमिटेडले जनाएको छ । बिक्री प्रबन्धकका अनुसार कम्पनीको सेयर धनी बन्न २१ लाख ५७ हजार ६३१ जनाले २ करोड ५९ लाख ४० हजार ५ सय ६० कित्ताका लागि आवेदन दिएका थिए । यो माग भन्दा ९ गुण बढी हो ।

कम्पनीले गत फागुन २ गतेदेखि सर्वसाधरणका लागि २८ लाख ७५ हजार सेयरको बिक्री खुल्ला गरेको थियो । निष्कासन भएको सेयरमध्ये ९३ हजार ७ सय ५० कित्ता कर्मचारीका लागि र १ लाख ५६ हजार २ सय ५० सेयर सामुहिक लगानी कोषको लागि छुट्याइएको थियो । बाँकी २८ लाख ७५ हजार किता भने सर्वसाधारणका लागि निष्कासन गरिएको थियो । कम्पनीले गत चैत ८ गतेदेखि ११ गतेसम्म सेयर निष्कासन गरेको थियो ।

कम्पनीले यसअघि पनि आयोजना प्रभावित स्थानीयका लागि सेयर निष्कासन गरी बाँडफाँड गरिसकेको छ । कम्पनीले रामेछापको लिखु नदीमा निर्माण गरेको आयोजना सम्पन्न भई सञ्चालनमा आइसकेको छ । आयोजनाले अहिले व्यापारिक उत्पादन गरिरहेको छ । यो आयोजना ९ अर्ब ५४ करोड रुपैयाँ लागतमा सम्पन्न भएको हो ।