ऊर्जा खबर
काठमाडौं । जलविद्युतमा लगानी गर्दै आएको हाइड्रो इलेक्ट्रीसिटी इन्भेष्टमेन्ट एण्ड डेभलपमेन्ट कम्पनी लिमिटेड (एचआइडिसिएल) ले ८ प्रतिशत बोनस सेयर दिने भएको छ । कम्पनीले २०७७/७८ को संचित मुनाफाबाट आफ्नो सेयरधनी सदस्यलाई लाभांस र बोनस सेयर दिन लागेको हो ।
चुक्ता पुँजीको ८ प्रतिशत अर्थात १ अर्ब ४९ करोड ६० लाख रुपैयाँ बराबरको बोनस सेयर र ०.४२१ प्रतिशत अर्थात ७ करोड ८७ लाख ३६ हजार ८ सय ४२ रुपैयाँ बराबरको नगद लाभांस वितरण गर्न लागिएको कम्पनीले जनाएको छ । कम्पनीका अनुसार कम्पनीको वार्षिक साधारणसभाले प्रस्ताव पारित गरेपछि लाभांस र बोनस सेयर वितरण गरिनेछ ।
कम्पनीले हालसम्म ४ सय ७६ मेगावाटका १३ आयोजनामा १० अर्ब ८८ करोड ऋण लगानी गरेको छ । ती मध्ये ९०.६ मेगावाटका ४ आयोजना सञ्चालनमा आइसकेका छन् ।
हालसम्म कम्पनीले १५ सय ४० मेगावाटका ५ आयोजना र ४ सम्बन्धित कम्पनीहरूमा ९ अर्ब ४५ करोड रुपैयाँ स्वपुँजी लगानी गरेको छ । पावर चाइनासँगको सहकार्यमा १ सय ५६ मेगावाटको माडी जलाशय र ७ सय ५६ मेगावाटको तमोर जलाशय निर्माण गर्न सम्झौता गरेको छ ।
.jpg)
