ऊर्जा खबर
काठमाडौं । राधी विद्युत कम्पनी लिमिटेडकाे हकप्रदमा अवितरित १३ लाख कित्ता सेयर कात्तिक २९ गतेदेखि लिलामी मार्फत बिक्री गर्ने भएको छ । कम्पनीले आफ्ना सेयरधनी सदस्यका लागि निष्कासन गरी बिक्री नभएको १३ लाख ५ सय २७ कित्ता सेयर लिलामी मार्फत बिक्री गर्न लागेको हो ।
कम्पनीले आफ्ना सेयरधनी सदस्यका लागि असोज ६ गतेदेखि असोज २५ गतेसम्मका लागि ९५ लाख ३५ हजार ७ सय ६० कित्ता हकप्रद सेयर निष्कासन गरेको थियो । हकप्रदमा रितपूर्वक आवेदन दिने ३८ हजार ५ सय ५ जना सेयरधनीलाई ८२ लाख ३५ हजार २ सय ३३ कित्ता सेयर बाँडफाँड गरी बाँकी रहेकाे १३ लाख ५ सय २७ कित्ता सेयर लिलामी मार्फत बिक्रीमा ल्याएको कम्पनीले जनाएको छ ।
कम्पनीले खुल्ला गर्न लागेकाे लिलामी सेयरमा लगानीकर्ताले न्यूनतम १ सय कित्तादेखि अधिकतम पुरै कित्ताका लागि आवेदन दिन पाउँनेछन् । आवेदकले बोलपत्र पेस गर्दा न्यूनतम सय रुपैयाँ वा सो भन्दा बढी बोलकबोल गर्नुपर्नेछ । आवेदकले मंसिर ८ गतेसम्म आवेदन दिन सकिनेछ । कम्पनीको सेयर निष्कासन गरी बाँडफाँड गर्न मुक्तिनाथ क्यापिटल लिमिटेडलाई बिक्री प्रबन्धक तोकिएको छ ।
कम्पनीको लमजुङमा ४।४ मेगावाटको राधी विद्युत स्मल जलविद्युत आयोजना सञ्चालनमा छ । यो आयोजनाले २०७१ जेठ ३१ गतेदेखि निरन्तर विद्युत उत्पादन गरिरहेको छ । कम्पनीले विगत वर्षहरुदेखि नै सेयरधनीहरुलाई बोनस, नगद, लाभांश, प्रतिफल दिँदै आएको छ । अहिले दोस्रो बजारमा कम्पनीको सेयर किनबेचलाई आकर्षणको रुपमा हेर्ने गरिएको छ ।
.jpg)