ऊर्जा खबर
काठमाडौं । नेपाल हाइड्रो डेभलपर्स कम्पनीको बोनस सेयर नेपाल स्टक एक्सचेञ्ज (नेप्से) मा सूचिकृत भएको छ । कम्पनीको बोनस सेयर मंगलबार (हिजो) सूचिकृत भएको हो ।
गत आर्थिक वर्ष २०७६/७७ को मुनाफाबाट आफ्ना सेयरधनी सदस्यलाई वितरण गरेको १५ प्रतिशत बोनस सेयर नेप्सेमा सूचिकृत भएको कम्पनीले जनाएको छ । कम्पनीका अनुसार ३ लाख ९० हजार कित्ता बोनस सेयर नेप्सेमा सूचीकृत भएको हो ।
कम्पनीले यसअघि २०७४/७५ को नाफाबाट ४ प्रतिशत बोनस सेयर दिने घोषणा गरेको थियो । तर, साधारणसभा हुन नसक्दा पारित नभएपछि खारेज भएको थियो । उक्त ४ प्रतिशत बोनस सेयर समेत समावेश गरी अहिले १५ प्रतिशत बोनस सेयर वितरण गरिएको कम्पनीले जनाएको छ ।
बोनस सेयर, सेयरधनीको डिम्याट खातामा आएपछि दोस्रो बजारमा किनबेच गर्न सकिनेछ । कम्पनीको दोलखामा ३.५२ मेगावाटको चरनावती खोला जलविद्युत आयोजना सञ्चालनमा छ । यो आयोजनाबाट २०७० जेठदेखि विद्युत उत्पादन भइरहेको छ ।
