ऊर्जा खबर
काठमाडौं । लुम्बिनी विकास कोषद्वारा दसैंको अवसर पारेर सञ्चालित ‘धम्म यात्रा’ बिजुली बसको यान्त्रिक परीक्षण सफल भएको छ । लामो समयदेखि लुम्बिनीमा थन्किएका बसकाे असोज १३ गतेदेखि गरेको परीक्षण सफल भएको हो ।
एसियाली विकास बैंकले लुम्बिनीलाई प्रदूषणमुक्त बनाउनका लागि पाँच बस र १४ भ्यान कोषलाई उपलब्ध गराएको थियो । दसैं, तिहार र छठ पर्वसम्म सञ्चालन गरिएको यान्त्रिक परीक्षण सफल भएको लुम्बिनी विकास कोषका सदस्य तथा परीक्षण इकाई समितिका संयोजक विश्व पौडेलले बताए ।
‘असोज १३ देखि कात्तिक १३ गतेसम्म बौद्ध परिपथका क्षेत्रबाट २० हजार दुई सय ३६ यात्रुले निःशुल्क धम्म यात्रा बिजुली बसको सेवा लिएका थिए’ उनले भने, छ रूटमा ५ बसमार्फत ५२७ पटक बस सञ्चालन हुँदा १६३८५ किलोमिटर यात्रा गरेको छ ।’
यान्त्रिक परीक्षण इकाई समितिका अनुसार लुम्बिनी–बेलहिया रूटमा सबैभन्दा बढी १६० पटक बस चल्दा ५७८३ यात्रुले निःशुल्क बिजुली बसको सेवा लिएका थिए । लुम्बिनी–तिलौराकोट रुटमा १३१ पटक बस चल्दा ५०७२, लुम्बिनी–रामग्राम रुटमा ४८ पटक बस चल्दा २२७० तथा लुम्बिनी–बुटवलमा ४६ पटक बस चल्दा १३४६ यात्रुले सेवा लिएको पौडेलले बताए ।
बसको यान्त्रिक अवस्था, चार्जिङ जस्ता प्राविधिक पक्षको परीक्षण गर्दा सफल देखिएको कोषका कोषाध्यक्ष सिद्धिचरण भट्टराईले बताए । उनले आवश्यक प्रक्रिया पूरा गरेर कोषले बसलाई व्यावसायिक रूपमा सञ्चालनका लागि तयारी गरेको बताए ।
उक्त धम्म यात्रा सञ्चालनका लागि जिल्ला प्रशासन कार्यलय रूपन्देहीको संयोजनमा नेपाली सेना, नेपाल प्रहरी र ससस्त्र प्रहरीले चालक र सहयोगी उपलब्ध गराएको थियो ।
