ऊर्जा खबर
काठमाडौं । टाइम्स इनर्जी प्रालिले निर्माण गर्न लागेको ३४१ मेगावाटको बूढीगण्डकी आंशिक जलाशय जलविद्युत् आयोजनाको वातावरणीय प्रभाव मूल्यांकन (इआइए) प्रतिवेदन स्वीकृतिको प्रक्रिया अघि बढेको छ । कम्पनीले अधययन गरेको आयोजना इआइए स्वीकृतिका लागि वन तथा वातावरण मन्त्रालय पठाएको छ ।
मन्त्रालयले स्वीकृति दिनुअघि सार्वजनिक सूचना निकालेर आयोजना निर्माण तथा सञ्चालन गर्दा कुनै प्रतिकुल असर पर्ने भए आगामी सात दिनभित्रमा राय/सुझाव पेश गर्न आग्रह गरेको छ ।
कम्पनीका अनुसार प्रतिवेदन तयारी गर्ने क्रममा सो क्षेत्रको प्राकृतिक, भौतिक, जैविक, सामाजिक, साँस्कृतिक र आर्थिक प्रणालीमा के कस्तो प्रभाव पर्दछ भनी यकिन गर्न सो क्षेत्रको नगरपालिका, गाउँपालिका, विद्यालय, अस्पताल, स्वास्थ्य चौकी तथा सरोकारवाला व्यक्ति वा संस्थासँग लिखित राय/सुझाव माग गरिएको छ ।
प्रस्तावित आयोजना गोरखा जिल्लाको चुमनुब्री र धार्चे गाउँपालिका भएर बग्ने बुढीगण्डकी नदीमा निर्माण गरिनेछ । आयोजना निर्माण गर्दा चुमनुब्री गाउँपालिका–३ र धार्चे गाउँपालिका १ र ३ मा प्रभाव पर्नेछ ।
यो आयोजना पिकिङ रन अफ दि रिभर प्रकृतिको आयोजना हो । यसको मुख्य संरचना बुढीगण्डकी नदीको दायाँ किनारामा रहने गरी डिजाइन तयार पारिएको कम्पनीले जनाएको छ । आयोजनाको दैनिक ५ घन्टाको दरले पिकिङ हुने गरी पोखरी निर्माण गरिनेछ । यसको डिजान बहाज १००.२७ घनमिटर प्रति सेकेण्ड र कुल हेड ३९८ मिटर रहने अध्ययनले देखाएको छ ।
बूढीगण्डकी नदीमा बाँध बाँधी खोलाको दायापट्टि निर्माण हुने इन्टेकबाट पानीलाई फर्काइ आयोजनाको मुख्य संरचनाहरूः सेटलिङ बेसिन, हेडरेस टनेल, सर्ज साफ्ट, पेनस्टक पाइप हुँदै विद्युतगृहमा पुर्याउनेगरी डिजानइ तयार भएको छ । भूमिगत विद्युतगृहमा ५७ मेगावाटका ६ वटा भर्टिकल एक्सिस पेल्टोन टर्वाइनमार्फत विद्युत उत्पादन गरिनेछ ।
आयोजनाको सबै काम पूरा गरे २०८५ चैतदेखि व्यवसायिक उत्पादन गर्ने कम्पनीको लक्ष्य छ । आयोजना निर्माण पूरा भएपछि वार्षिक १८३७.१६ गिगावाट घन्टा विद्युत उत्पादन गर्न सक्छ । उत्पादित ऊर्जालाई करिब ४५ किलोमिटर लामो प्रसारणलाइन निर्माण गरी रातमाटे सबस्टेसनमा जोडिनेछ ।
