ऊर्जा खबर
काठमाडौं । नुम्बुर दुधकुण्ड हाइड्रो पावर प्रालिले ९.४८ मेगावाट तल्लो दुधकुण्ड खोला जलविद्युत आयोजना ४ वर्षमा सम्पन्न गर्ने लक्ष्य राखेको छ । कम्पनीले कोशी प्रदेश अन्गर्गत सोलुखुम्बु जिल्लामा पहिचान भएको आयोजना २०८४ मंसिरभित्र सम्पन्न गर्ने लक्ष्य लिएको हो ।
जिल्लाको सोलुदुधकुण्ड नगरपालिका भएर बग्ने दुधकुण्ड खोलामा पहिचान भएको आयोजनाको निर्माण गर्न लागेको कम्पनीले जनाएको छ । कम्पनीकाअनुसार आयोजनाको काम अघि बढाउन विद्युत विकास विभागमा आवेदन दिइएको छ । विभागबाट स्वीकृत प्राप्त हुने लगतै आयोजनाको काम अघि बढाइनेछ ।
प्रस्तावित आयोजना निर्माण तथा सञ्चालन गर्दा आयोजना स्थलमा उल्लेखनीय प्रतिकुल असर पर्ने भएमा सूचना प्रकाशित भएको ३५ दिनभित्रमा सरोकारवालालाई लिखित राय/सुझाव पेश गर्न आग्रह गरेको छ ।
यो आयोजना नदी प्रवाहीमा आधारित (रन अफ रिभर) प्रकारको आयोजना हो । यस आयोजनाको डिजाइन बहाब ५.५१ घनमिटर प्रति सेकेण्ड र ग्रस हेड २१०.५ मिटर रहनेछ । आयोजनाबाट वार्षिक सरदर ५७.२५ गिगावाट घण्टा विद्युत उत्पादन हुने अध्ययनले देखाएको छ ।
आयोजनाको मुख्य संरचनाहरू दुधकुण्ड खोलाको दायाँ किनारमा पर्दछन् । ३१.५ मिटर लम्बाइ, १७.६ मिटर चौडाई र १९ मिटरको उचाई भएको सतही विद्युत गृहमा २ वटा ४.९३७ मेगावाटका २ वटा टवाईनमा पानी खसाली सो टवाईनसँग जोडिएको २ वटा ६ मेगाभोल्ट एम्पिएर क्षमताका जेनेरेटर मार्फत वद्युत् उत्पादन गरिनेछ ।
उत्पादित विद्युत्लाई विद्युतगृह नजिकै बनाएकाे स्वीच्यार्डबाट ३३ केभी प्रसारण लाइन मार्फत ५ किलोमिटरको दुरीमा रहेको अपर सोलु खोला जलविद्युत आयोजनाको स्वीचयार्डसम्म र त्यहाँबाट १३२ केभी प्रसारण लाइन मार्फत २० किलोमिटरको दुरीमा रहेको नेपाल विद्युत प्राधिकरणको तिङ्गला सबस्टेसनमा जोडी राष्ट्रिय प्रसारण लाइनमा समाहित गरिनेछ । आयोजना निर्माण तथा सञ्चालन गर्दा भू–क्षय, वायू प्रदुषण आदिद्वारा वातावरणमा उल्लेखनीय प्रतिकुल असर नपर्ने गरी निर्माण गरिनेछ ।
