ऊर्जा खबर
काठमाडौं । नेपालमा उत्पादित विद्युत खपत विस्तार गर्ने चर्चा व्यापक चलिरहँदा २०७९ साउनमा मात्र ४५९ वटा तीन पाङ्ग्रेसहित ६७० विद्युतीय सवारी भित्रिएका छन् । आर्थिक वर्ष २०७८/७९ को बजेटले विद्युत सवारीमा अन्तशुल्क खारेज र कर घटाएपछि विद्युतीय सवारीको आयात बढेको हो ।
भन्सार विभागको तथ्याङ्क अनुसार ४५९ वटा तीन पाङ्ग्रे (सफा टेम्पो, विद्युतीय रिक्सा) सवारी आयात भएका छन् । यस्तै, बाँकी, २११ वटा चार पाङग्रे विद्युतीय सवारी (कार, जिप, भ्यान) आयात भएका छन् ।
नेपाल भित्रिएका तीन पाङग्रे सवारीमध्ये ४३७ वटा चिनबाट र २२ वटा भारतबाट आएका हुन् । यस्तै, चार पाङग्रे १०० किलोवाटसम्मका २०५ वटा सवारी आयात भएको विभागको तथ्याङ्कमा छ । जसमा चिनबाट ३८, कोरियाबाट ४२ वटा र भारतबाट १२५ वटा आयात भएका छन् ।
यस्तै, १०० देखि २०० किलोवाटसम्मका ४ सवारी भित्रिएका छन् । २ वटा कोरियाबाट र २ वटा सयुक्त राज्य अमेरिकाबाट ल्याइएको छ । बाँकी, २०० देखि ३०० किलोवाट क्षमतासम्मका २ वटा सवारी पनि सयुक्त राज्य अमेरिकाबाट आयात गरिएको विभागको तथ्याङ्कमा उल्लेख छ ।
