मैलुङ खोलाको सेयर भर्ने आज अन्तिम दिन, ३५ गुणा बढी आवेदन परिसक्यो

काठमाडौं । मैलुङ खोला जलविद्युत कम्पनीको सेयर भर्ने आज अन्तिम दिन हो । कम्पनीले गत बिहीबारदेखि सर्वसाधारणका लागि खुल्ला गरेको सेयर आवेदन अवधि आज साँझ ५ बजेबाट सकिन लागेको हो ।

कम्पनीको सेयर भर्न लगानीकर्ताको उत्साहजनक सहभागिता देखिएको छ । आइतबार कार्यालय समयसम्मको तथ्यांक अनुसार १७ लाख ७६ हजार ७ सय २० जनाको २ करोड ४१ लाख ६२ हजार ९ सय ९० कित्ताका लागि आवेदन परेको बिक्री प्रबन्धक सिद्धार्थ क्यापिटल लिमिटेडले जनाएको छ । बिक्री प्रबन्धकका अनुसार यो मागभन्दा ३५.२८ गुणा बढी हो ।

कम्पनीले रसुवामा सञ्चालित ५ मेगावाटको मैलुङ खोला जलविद्युत आयोजनाको सर्वसाधारका लागि सय रुपैयाँ अंकित ७ करोड ३६ लाख २८ हजार ६ सय रुपैयाँ बराबरको ७ लाख ३६ हजार २ सय ८६ कित्ता सेयर निष्कासन गरेको छ । निष्कासित सेयरमध्य २ प्रतिशत अर्थात १४ हजार ७ सउ २६ कित्ता सेयर कर्मचारीहरुका लागि र ५ प्रतिशत अर्थात ३६ हजार ८ सय १४ कित्ता सेयर सामूहिक लगानी कोषका लागि छुट्याएको छ ।

बाँकी ६ लाख ८४ हजार ७ सय ४६ कित्ताका लागि सर्वसाधारणका लागि खुल्ला गरिएको छ । सर्वसाधारणले न्यूनतम १० कित्ताका देखि अधिकतम १ लाख कित्ता सम्मका लागि आवेदन दिन सक्नेछन् ।

कम्पनीले यसअघि आयोजना प्रभावित स्थानीयका लागि छुट्याएको निष्कासन गरी बाँडफाँड गरिसकेको छ । यो कम्पनीले ३ वर्षदेखि बोर्डको स्वीकृति पर्खिरहेको थियो । कम्पनीले २०७४ माघ १८ गते आवेदन दिएको थियो । यो कम्पनीले आवेदन दिएको साढे ३ वर्ष पछि सेयर निष्कासनको अनुमति पाएको हो । कम्पनीले निर्माण सम्पन्न गरी सञ्चालनमा ल्याएको आयोजनाले २०७१ असार १९ गतेदेखि विद्युत उत्पादन गरिरहेको छ ।