जलजले-बुईंपा ३३ केभी लाइनको पोल ढल्दा ३ जिल्लाको विद्युत सेवा अवरुद्ध

काठमाडौं । केही दिनदेखिकाे अवीरल वर्षाका कारण विद्युतीय संरचनामा क्षति पुग्दा ३ जिल्लाकाे विद्युत सेवा अवरुद्ध भएकाे छ । नेपाल विद्युत प्राधिकरणकाे ३३ केभी  जलजले-बुईंपा प्रसारण लाइनकाे पाेलमा क्षति पुग्दा खोटाङ, सोलुखुम्बु र ओखलढुङ्गा जिल्लाकाे विद्युत सेवा अवरुद्ध हुन पुगेकाे हाे ।

भारी वर्षाले प्रसारण लाइनकाे २ वटा पाेलमा क्षति पुगेपछि मध्यान्ह १२ बजेदेखि विद्युत लाइन काटिएकाे प्राधिकरण दिक्तेल वितरण केन्द्र प्रमुख ललितनारायण चाैधरीले बताए । ‘निरन्तरकाे झरीले जमिन गिलाे हुँदा विद्युत प्रवाह हुने लाइनका पाेल ढलेका छन् , ‘उनले ऊर्जा खबरसँग भने, ‘अहिले ३ जिल्लामा विद्युत लाइन काटिन पुगेकाे छ ।’

प्रसारण प्रणालीकाे  पोल ढल्दा सोलुखुम्बु वितरण केन्द्र अन्तर्गतका करिब १ हजार १ सय र दिक्तेल अन्तर्गत २० हजार ग्राहकको सेवा अवरुद्ध भएको छ । ओखलढुङ्गाका करिब  साढे ९ हजार ग्राहकको विद्युत सेवा बन्द भएको वितरण केन्द्रले जनाएको छ । यस वितरण केन्द्रले थप २५ सय ग्राहकलाई रामेछापको साँगुटारदेखि आउने फिडरबाट विद्युत सेवा दिइरहेकाे छ । 

विद्युत् सेवा अवरुद्ध हुँदा हजारौ सेवाग्राही मारमा परेका छन् । विद्युत अभावमा जिल्लामा विद्युतीय उपकरण, सञ्चारमाध्यम, व्यापार व्यवसाय प्रभावित भएको छ । उनले क्षतिग्रस्त लाइनकाे मर्मत गरी अवरुद्ध सेवा सुचारु गराउने काम सुरु भइसकेकाे पनि उनले बताए ।