ऊर्जा खबर
काठमाडौँ । सिन्धुलीमा निर्माणाधीन सुनकोसी–मरिन डाइभर्सजन आयोजनाको बाँध निर्माण कार्य जम्मा १९ प्रतिशत सकिएको छ । ऊर्जा, जलस्रोत तथा सिँचाइ मन्त्री दीपक खड्का नेतृत्वको टोलीले उक्त आयोजना अवलोकन गर्ने क्रममा शनिबार जलस्रोत तथा सिँचाई विभागका महानिर्देशक सञ्जीव बरालले यस्तो जानकारी गराएका हुन् । हालसम्म आयोजनाको बाँध निर्माणको प्रगति कम्तिमा ५० प्रतिशत पुग्नुपर्नेमा त्यसको आधा पनि प्रगति हुन नसक्नु दुःखको कुरा भएको उनले बताए ।
ठेकेदार रमन कन्ट्रक्सन कम्पनीले तीव्र गतिमा काम नगरेको र यस्तै अवस्थामा काम अघि बढ्ने हो भने ठेक्का सम्झौता तोडिने पनि उनले जानकारी गराए । कुल १४ अर्ब रुपैयाँको लागत अनुमान गरिएको आयोजनामा हालसम्म १ अर्ब २० करोड मोविलाइजेशन खर्च परिचालन गरिसकेको उनको भनाइ छ ।
स्मेक कन्सल्यान्टका प्रतिनिधी दिवस श्रेष्ठले आयोजना निर्माणको काम चित्तबुझ्दो नभएको बताउँदै समयमै काम सम्पन्न गर्न आफूहरुले ठेकेदार कम्पनीलाई निरन्तर खबदारी गरिरहेको बताए । आयोजनाको प्रगति विवरण सुनेपछि मन्त्री खड्काले उक्त बहुउदेश्यीय आयोजनाको काम तोकिएकै समयमा सम्पन्न गर्न ठेकेदार कम्पनीलाई निर्देशन दिएका छन् ।
‘आयोजना निर्माणको कामलाई तीव्र गतिमा अघि बढाउनुस्, काम तेकिएकै समयमा सक्ने गरी लाग्नुस्, काम गर्ने स्पिड बढाउनुस्, कार्यप्रगतिको आधारमा बजेटको अभाव हुँदैन,’ उनले भने । उर्जा मन्त्री खड्काले आयोजनाको १३.२ किलोमिटर सुरूङ निर्माण सकिएकोले पनि आयोजना चाँडो सक्नुपर्ने बताए ।
आयोजनाबाट १ लाख २२ हजार हेक्टर जमिनमा सिँचाइ हुने र ३२ मेगावाट विद्युत् उत्पादन हुने र कुल पानीको १० प्रतिशत खानेपानी सुविधा उपलब्ध गराउने भएकोले सबै मिलेर काम गर्नुपर्ने बताए ।
ठेकेदार कम्पनी रमन कन्ट्रक्सनका प्रतिनिधी रमन पटेलले विभागबाट हुने भुक्तानी बेलैमा नभएका कारण आयोजना निर्माणमा केही ढिलाई भएको भन्दै सरकारले सहयोग गरे आफूहरुले समयमै आयोजना सम्पन्न गर्ने बताए ।
सोही अवसरमा उर्जामन्त्री खड्काले उक्त आयोजनाको टनेल, पावरहाउस र हेडवक्सको अवलोकन तथा निरीक्षण गरेका थिए । मन्त्री खड्कासँगै मन्त्रालयका सहसचिव सुशीलचन्द्र आचार्य, मित्र बराललगायत मन्त्रालयका अधिकारीहरूको सहभागिता थियो ।
