ऊर्जा खबर
काठमाडौँ । विद्युत् उत्पादन कम्पनी लिमिटेडले १ हजार ९०२ मेगावाटको मुगु कर्णाली जलाशययुक्त जलविद्युत् आयोजना र ४५४ मेगावाटको किमाथांका अरुण अर्धजलाशययुक्त जलविद्युत् आयोजनाको ५१ प्रतिशत संस्थापक शेयर बिक्री गर्ने भएको छ । प्रतिस्पर्धामार्फत शेयर बिक्रीका लागि कम्पनीले आइतबार सूचना जारी गरी १५ दिनभित्र आशयपत्र पेश गर्न आह्वान गरेको छ ।
सूचना अनुसार मुगु कर्णालीको अनुमानित लागत ४ खर्ब ६० अर्ब रुपैयाँ रहेको र किमाथांका अरुणको ९३ अर्ब ८० करोड रुपैयाँ छ । आयोजना निर्माणमा कुल लागतको २५ प्रतिशत स्वपूँजी र ७५ प्रतिशत ऋण लगानी रहने भएकोले स्वपूँजीको ५१ प्रतिशत रकममा लगानी साझेदारी गर्ने गरी कम्पनीले शेयर बिक्रीको प्रस्ताव आह्वान गरेको हो ।
यस अनुसार मुगुकर्णालीमा बहुमत शेयर लिएर लगानी साझेदारी गर्ने चाहने नेपाली व्यक्ति, कम्पनी वा संस्थाले न्यूनतम ४८ करोड बहत्तर लाख ४३ हजार ४२३ रुपैयाँ र किमाथांका अरुणका लागि ९० करोड ८१ लाख ९ हजार ३०२ रुपैयाँ न्यूनतम कबोल रकम वा सोभन्दा माथि लगानी रकम उल्लेख गरी प्रस्ताव पेश गुर्नपर्ने छ ।
शेयर बिक्रीको यो प्रस्तिस्पर्धामा न्यूनतम कबोल मूल्यभन्दा बढी मूल्यलाई आधार बनाइने कम्पनीको सूचनामा उल्लेख छ ।
संखुवासभाको भोटखोला गाउँपालिका– २ भई बहने अरुण नदीमा यो किमाथांका अरुण निर्माणको प्रस्ताव गरिएको छ । आयोजनाको बाँध जिल्लाको छुम्सुर गाउँनजिकै अरुण नदीमा निर्माण हुनेछ । बाँधका कारण नदीमा करिब ०.३५० वर्ग किलोमिटर क्षेत्रफलमा फैलिएको १०३ लाख घनमिटर क्षमताको जलाशय बन्ने अनुमान गरिएको छ । आयोजनाबाट वार्षिक २६५५.१२ गिगावाट घन्टा बराबरको विद्युत उत्पादन हुनेछ ।
त्यस्तै, मुगु जिल्लास्थित कर्णाली नदीमा निर्माण हुने मुगु कर्णाली जलशययुक्त जलविद्यत् आयाेजनालाई नेपालकाे उर्जा सुरक्षा तथा माग सन्तुलनका दृष्टिले महत्त्वपूर्ण मानिएकाे छ ।
यस्तो छ सूचना
