पोल स्थानान्तरण गर्न इटहरीका ३ फिडरको सेवा ६ दिन बन्द

काठमाडौं । नेपाल विद्युत प्राधिकरण इटहरी वितरण केन्द्र अन्तर्गत सडक विस्तार भएकाे स्थानकाे पोल स्थानान्तरण गर्न ३ वटा फिडरको विद्युत सेवा बन्द गरिएकाे छ । वितरण केन्द्रले एनटीसी, उद्योग लविपुर र इटहरी फिडरको विद्युत सेवा ६ दिनका लागि  बन्द गरेको हाे ।

मंगलबार (आज) बिहान ९ बजेदेखि ३ वटै फिडरको सेवा बन्द गरेर विस्तारित सडकका पोल स्थानान्तरणको काम सुरु गरेको वितरण केन्द्रले जनाएको छ । वितरणा केन्द्रका अनुसार विद्युत सेवा आगामी २३ गते (आइतबार) सम्म बन्द हुनेछ । दैनिक ८ घन्टाका लागि अवरुद्ध हुने सेवा ५ बजेबाट सुचारु हुनेछ ।

लाइन अवरुद्ध हुँदा इटहरी फिडर अन्तर्गत ओसो चोक, बस्नेत टोल, राधाकृष्ण मन्दिर, तुलासा टोल र इटहरी चोकदेखि तरहरासम्मकाे  सेवा प्रभावित हुनेछ ।

यस्तै, एनटीसी फिडर अन्तर्गत कोसी गेस्ट हाउस नजिकको क्षेत्र, हेल्थपोस्ट, पशुपती मन्दिर, आइतबारे टेलीकमलगातय स्थानकाे सेवा प्रभावित हुनेछ । उद्योग लविपुर फिडर अन्तर्गत औद्योगिक ग्राहकको मात्र सेवा बन्द हुने वितरण केन्द्रले जनाएको छ । खनार, इटहरी चोकको पूर्व पश्चिम क्षेत्रदेखि झुम्का बजारसम्मका औधोगिक ग्राहकको सेवा बन्द हुनेछ ।