ऊर्जा खबर
काठमाडौं । न्यादी हाइड्रो पावर कम्पनीको सेयर आवेदन बिक्री खुल्ला भएको छ । कम्पनीले लमजुङमा निर्माणाधीन ३० मेगावाटको न्यादी जलविद्युत आयोजनाको सर्वसाधारणका लागि छुट्याएको साधारण सेयर बिक्री खुल्ला गरेको हो ।
पहिलो चरणमा आयोजना प्रभावित क्षेत्रका स्थानीयबासीका लागि सेयर निष्कासन गरी बाँडफाँड सम्पन्न गरेपछि दोस्रो चरणमा आमसर्वसाधारणका लागि छुट्याइएको २२ करोड ५० लाख रुपैयाँ मूल्यको सेयरको बिक्री खुल्ला गरेको कम्पनीले जनाएको छ । कम्पनीका अनुसार प्रतिकित्ता १ सय रुपैयाँ अंकित २२ लाख ५० हजार कित्ता साधारण सेयर निष्कासन गरिएको छ ।
निष्कासन भएको साधारण सेयरको ५ प्रतिशत हुन आउने १ लाख १२ हजार ५ सय कित्ता सेयर सामूहिक लगानी कोषका लागि तथा २ प्रतिशत हुन आउने ४५ हजार कित्ता सेयर कम्पनीमा कार्यरत कर्मचारीका लागि छुट्याइएको छ । बाँकी २० लाख ९२ हजार ५ सय कित्ताका लागि सर्वसाधारणले आवेदन दिन पाउने छन् ।
सर्वसाधारणका लागि असोज १९ गतेभित्र आवेदन दिनुपर्नेछ । यो समयभित्र निष्कासित सबै सेयरका लागि आवेदन नपरेको अवस्थामा ३१ गतेसम्म सेयर भर्न सकिने कम्पनीले जानकारी दिएको छ ।
सर्वसाधारण लगानीकर्ताले न्यूनतम १० देखि अधिकतम ५० हजार कित्तासम्म आवेदन दिन सकिनेछ । सेयर निष्कासन तथा बाँडफाँडका लागि ग्लोबल आइएमई क्यापिटल लिमिटेडलाई बिक्री प्रबन्धक नियुक्त गरिएको छ ।
पहिलो चरणमा स्थानीयबासीका लागि १८ करोड रुपैयाँ मूल्यको १८ लाख कित्ता सेयर निष्कासन गरी बाँडफाँड गरिएको छ । सेयर भर्ने सबै स्थानीयबासीले कम्पनीको सेयर पाएका छन् ।
यो बुटवल पावर कम्पनी (बिपिसी) को सहायक कम्पनी हो । कम्पनीले लगानी गरेको न्यादी जलविद्युत आयोजना निर्माणको अन्तिम चरणमा छ । सिभिल संरचना निर्माण कार्य पूरा भइसकेको छ ।
.jpg)
