ऊर्जा खबर
काठमाडौं । निर्माणाधीन ६ मेगावाटको माथिल्लो चौरी खोला जलविद्युत आयोजनामा २ बैंकले ऋण लगानी गर्ने भएका छन् । आयोजनामा राष्ट्रिय बाणिज्य बैंकको अगुवाईमा कृषि विकास बैंकले पनि ऋण लगानी गर्ने भएकाे हाे ।
काभ्रे र सिन्धुपाल्चोककाे सीमा भएर बग्ने चाैरी खाेलामा निर्माणाधीन आयोजनामा ऋण लगानीका लागि बैंक र प्रवर्द्धक कम्पनीबीच वित्तीय व्यवस्थापन सम्झाैतामा हस्ताक्षर भएकाे छ । आयोजना कर्णाली जलस्रोत लिमिटेडको सहायक हिमालय वाटर रिसर्च एण्ड इनर्जी डेभलपमेन्ट कम्पनीले निर्माण गरिरहेकाे छ ।
सम्झौता पत्रमा राष्ट्रिय वाणिज्य बैंकका प्रमुख कार्यकारी अधिकृत किरणकुमार श्रेष्ठ र कृषि विकास बैंकका प्रमुख कार्यकारी अधिकृत अनिलकुमार उपाध्याय र कम्पनीको तर्फबाट जुद्धबहादुर गुरुङले हस्ताक्षर गरेका छन् ।
आयोजनामा २ बैंकले ७२ कराेड ८० लाख रुपैयाँ ऋण लगानी गर्दैछन् । बैंकले गर्न लागेकाे ऋण लगानी कूल लागतकाे ६५ प्रतिशत हाे । ऋणकाे ६० प्रतिशत राष्ट्रिय बाणिज्य बैंकले र ४० प्रतिशत कृषि विकास बैंकले लगानी गर्ने गरी सम्झौता भएको छ ।
बाँकी ३५ प्रतिशत अर्थात ३९ करोड २० लाख रुपैयाँ स्वपुँजी लगानी छ । आयोजना सम्पन्न गर्न १ अर्ब १२ करोड कुल लागत अनुमान गरिएको छ ।
आयोजनाबाट २०७९ असोजदेखि विद्युत उत्पादन सुरु गर्ने लक्ष्य रहेको कम्पनीका अध्यक्ष लोकबहादुर रावतले बताए । उनले वर्षायाममा पनि आयोजना निर्माणको काम तीव्र पारेकाे उनले बताए । कम्पनीले आयोजना अघि बढाउन विद्युत विकास विभागबाट २०७४ बैशाख २९ गते उत्पादन अनुमति पाएको थियो ।
