ऊर्जा खबर
काठमाडौँ । संखुवासभामा निर्माणाधीन ९०० मेगावाटको अरुण–३ जलविद्युत् आयोजनका लागि अधिग्रहण गरिने थप जग्गाको मुआब्जा निर्धारण भएको छ । जिल्ला प्रशासन कार्यालयले जग्गाको मुआब्जा निर्धारण भएको र मुआब्जा लिन आउन सम्बन्धित जग्गाधनीहरूलाई आग्रह गर्दै सार्वजनिक सूचना जारी गरेको हो ।
आयोजनाका लागि आवश्यक मकालु गाउँपालिका–३ (साविक पाथिभरा गाविस वडा नम्बर ३ र ४) मा पर्ने उवा गाउँ तथा नयाँ बस्तीका जग्गाधनीलाई मुआब्जा बुझ्न जिप्रका संखुवासभाले आग्रह गरेको छ । आयोजनाको स्थलगत सूक्ष्म अध्ययन प्रतिवेदनमा आधारित भएर अधिग्रहण गरिने जग्गामा परेका घरगोठ टहरा तथा रुख विरुवासमेतको मुआब्जा वैशाख १३ गते बसेको बैठकले निर्धारण गरिएको थियो ।
निर्धारित मुआब्जा दरअनुसार साविक पाथिभरा गाविस–४ नयाँ बस्तीमा प्रतिरोपनी ८ लाख रुपैयाँ र पाथिभरा ३ का खेतको प्रतिरोपनी ८ लाख रुपैयाँ र बारीको प्रतिरोपनी ७ लाख ५० हजार रुपैयाँ कायम गरिएको छ ।
भारतको सतलज जलविद्युत् निगमको लगानी रहेको नेपाली कम्पनी एसजेभीएन अरुण–३ पावर डेभलपमेन्ट कम्पनी प्रालिले उक्त आयोजना विकास गरिरहेको छ । आयोजनाको भौतिक प्रगति ७० प्रतिशतभन्दा बढी भइसकेको छ ।
