तामाकोसी-बाह्रबिसे लाइनको काम तिब्र गतिमा, ११८ मध्ये ४१ टावर ठड्याइयो

काठमाडौं । नेपाल विद्युत प्राधिकरणले निर्माण गरीरहेको ४ सय केभी तामाकोसी–बाह्रबिसे प्रसारण लाइन आयोजनाको काम तिव्र गतिमा अघि बढेको छ । रामेछापको साँखेदेखि सिन्धुपाल्चोकको बाह्रबिसे खण्डको काम तिव्र गतिमा अघि बढेकाे हाे ।

लाइनको ४१ वटा टावर खडा भइसकेको आयोजनाका इन्जिनियर गजेन्द्र यादवले बताए । उनका अनुसार ७१ वटा टावरको जग खन्ने काम सकिएको छ। अब, छिट्टै तार तान्ने काम सुरु गर्ने पनि यादवले बताए ।

लाइनमा निर्माण गर्नुपर्ने ११८ वटा टावर मध्ये दोलखामा ८५ वटा, सिन्धुपाल्चोकमा २७ र रामेछापमा ३ वटा पर्छ । दोलखामा २ वटा टावर गुठीको जग्गामा परेकाले त्यसको निर्णयका लागि क्याविनेट पठाउने तयारी छ ।

दोलखा र सिन्धुपाल्चोकमा पर्ने टावरको काम तिब्र गतिमा भइरहेको छ । यस मध्ये दोलखामा १८ वटा र सिन्धुपाल्चोकमा १३ वटा टावर वन क्षेत्रमा पर्छ । वनमा टावर निर्माणका लागि एक हजार र तारमुनी पर्ने रुख ४ हजार काट्नु पर्ने देखिएको छ । 

आयोजनाको टावरले ओगट्ने जग्गाको ९ करोड मुआव्जा वितरण भइसकेको छ। आयोजनाको दोलखामा पर्ने टावरले ओगट्ने निजी आवादी जग्गाको मुआव्जा वितरण गरेको हो । प्रमुख जिल्ला अधिकारीको अध्यक्षतामा रहेको मुआब्जा निर्धारण समितिले तोकेको मूल्याङ्नका आधारमा आयोजनाले मुआब्जा वितरण भइरहेको छ ।

आयोजनाको टावर राख्दा २१६ रोपनी जग्गा अधिग्रहण गर्नुपर्छ । औषतमा प्रति रोपनी ७ लाख मूल्याङ्कन भएको यादवले जानकारी दिए । दोलखा जिल्लामा मात्र करिब १५ करोड मुआव्जा वितरण गर्नु पर्नेमा ६० प्रतिशत बढी वितरण भइसकेको बताए । आयोजनाले एक वर्ष अघि मात्र मुआब्जा वितरण सुरु गरेको हो ।

तामाकोसी नदी र आसपासको विद्युत् काठमाडौंसम्म पुर्याउन निर्माण गरिएको लाइन अन्तर्गत २ प्याकेजका काम भइरहेको छ । आयोजनाको पहिलो खण्डको तामाकोसी (रामेछापको साँखेदेखि सिन्धुपाल्चोकको बाह्रविसे) सम्मको नयाँ ठेक्का भारतीय कम्पनी केइसी इन्टरनेशनल लिमिटेडले पाएको छ ।

कम्पनीले करीब ४४ किलोमिटर प्रसारण लाइनको डिजाइन, उपकरण आपूर्ति, जडान र सञ्चालनका लागि एक करोड ७३ लाख १७ हजार अमेरिकी डलर र ७१ करोड ७७ लाख ९७ हजार (करबाहेक) रुपैयाँमा ठेक्का पाएको आयोजना प्रमुख रमणराज शर्माले जानकारी दिए । आयोजना र प्रसारण लाइनको जिम्मा पाएको कम्पनी केइसीले संयुक्त रुपमा सर्भे र डिजाइनपछि टावरको गरिरहेको छ ।