शाक्य र घिसिङको मुद्दाको पेशी आज, इजलास परिवर्तन गरियो

काठमाडौँ । नेपाल विद्युत् प्राधिकरणका बहालवाला कार्यकारी निर्देशक हितेन्द्रदेव शाक्य र पूर्व कार्यकारी निर्देशक कुलमान घिसिङको रिट निवेदनमाथि सुनुवाइका लागि आज (मंगलबार) न्यायाधीशहरू कुमार चुडाल र नित्यानन्द पाण्डेयको संयुक्त इजलासमा पेशी तोकिएको छ ।

यसअघि आइतबार दुवै मुद्दाको पेशी प्रधानन्यायाधीश प्रकाशमानसिंह राउत र न्यायाधीश शारङ्गा सुवेदीको संयुक्त इजलासमा तोकिएको भए पनि अदालतले दुवै मुद्दा हेर्न नमिल्ने सूचीमा राखेको थियो । घिसिङको मुद्दामा विपक्षीका तर्फबाट वरिष्ठ अधिवक्ता राधेश्याम अधिकारीले बहस गर्नुपर्ने र अघिकारी प्रधानन्यायाधीश राउतको ‘ल फर्म’का पूर्वसाझेदार रहेकाले इजलाशले उक्त दुवै रिट निवेदन हेर्न नमिल्ने सूचीमा राखिदिएको थियो । मंगलबार भने दुवै मुद्दाको इललास परिवर्तन गरिएको हो ।

शाक्यले यसअघि आफूलाई प्राधिकरणको कार्यकाल पूरा नगरी सरकारले पदमुक्त गरेको भन्दै त्यस निर्णयविरुद्ध सरकारलाई विपक्षी बनाई अन्तरिम आदेशको माग गर्दै अदालतमा रिट निवेदन दिएका थिए । यद्यपी, आफूले रिट दायर गरेको साढे ३ वर्षसम्म अदालतले ३२ पटक पेशी सारेर मुद्दामा सुनुवाइ तथा आदेश नगरेको भन्दै उक्त मुद्दामा पहिला सुनुवाइ र आदेशको माग गर्दै पुनः रिट निवेदन दायर गरेका हुन् ।

घिसिङले पनि वर्तमान सरकारले आफ्नो कार्यकाल करिब ४ महिना बाँकी छँदै पदमुक्त गर्ने निर्णय गरेकोले उक्त निर्णय कार्यान्वयन नगर्न अन्तरिम आदेशको माग गर्दै रिट निवेदन दायर गरेका थिए ।