सुख्खा पहिराले थुनिएको तामाकोसी ४ घण्टापछि बग्न थाल्याे

दोलखा । माथिल्लो तामाकोसी जलविद्युत् आयोजनाको बाँधस्थलभन्दा करिब २ किलोमिटरमाथि सुख्खा पहिरोले थुनिएको तामाकोसी नदी ४ घण्टापछि खुलेको छ । देउराली भन्ने ठाउँमा बिहान साढे १० बजेदेखि निरन्तर झरेको सुख्खा पहिरोले नदी थुनिएको थियो ।

थुनिएको ठाउँमा पानी भरिएर अहिले पानी बग्न थालेको लामाबगरदेखि सडक निर्माणमा खटिएका लप्ची खोला जलविद्युत् आयोजनाको फिल्ड इञ्चार्ज हेमराज तमाङले जानकारी दिए । थुनिएको ठाउँबाट निरन्तर बग्न थालेकोले जोखिम घटेको उनले बताए ।

थुनिएको ठाउँबाट बगेको पानी माथिल्लो तामाकोसी जलविद्युत् आयोजनाको बाँध रहेकोले त्यसले पनि पानीको बहाब रोक्ने हुनाले तल्लो तटीय क्षेत्रमा जोखिम नभएको इलाका प्रहरी कार्यालय सिंगटीले जनाएको छ ।

लामाबगरदेखि माथिल्लो क्षेत्रमा लप्ची खोला जलविद्युत् आयोजनाले सडक निर्माण गरिरहेका बेला बेलामा यस्तो सुख्खा पहिरो झर्दै आएको छ ।