ऊर्जा खबर
काठमाडौँ । नेपालले बंगलादेशका उद्योगी–व्यवसायीसहितका लगानीकर्तालाई नेपालमा लगानी गर्न आह्वान गरेको छ । वैशाख १६ र १७ गते नेपालले आयोजना गर्न लागेको लगानी सम्मेलनमा बंगलादेशी लगानीकर्तालाई आकर्षित गर्ने उद्देश्यले बंगलादेशस्थित नेपाली राजदूताबासले ढाकामा आयोजना गरेको एक सेमिनार कार्यक्रममार्फत यस्तो आग्रह गरिएको हो ।
कार्यक्रममा बंगलादेशका लागि नेपालका राजदूत घनश्याम भण्डारीले नेपालको विद्युत्, भौतिक पूर्वाधार, पर्यटनसहितका सेवा क्षेत्र, औषधिजन्य उद्योग, सूचना–प्रविधि क्षेत्रमा लगानी गर्न आह्वान गरेका छन् । यी क्षेत्रमा लगानी गर्दा मनग्य प्रतिफल प्राप्त हुन् समेत उनले जानकारी गराए ।
कार्यक्रममा बंगलादेशाक ऊर्जा तथा प्राकृतिक स्रोत राज्यमन्त्री नसरुल हमिदले दुई देशको सम्बन्ध अझ प्रगाढ बनाउन समेत आपसी लगानी अभिवृद्धिले सहयोग पुर्याउने बताए । ऊर्जा क्षेत्रमा बंगलादेशले बढाएको सहकार्यबारे बताउँदै उनले बंगलादेशको बढ्दो ऊर्जा मागलाई सम्बोधन गर्न दुई देशबिचको सहकार्य महत्त्वपूर्ण हुने बताए ।
कार्यक्रममा लगानी बोर्डका प्रमुख कार्यकारी अधिकृति सुशील भट्टले नेपालमा लगानीका अवसरबारे जानकारी गराएका थिए । त्यस्तै, बोर्डका सहसचिव बाबुराज अधिकारीले लगानी सम्मेलनसम्बन्धी जानकारीमूलक सामग्री प्रस्तुत गरेका थिए ।
सेमिनारमा प्रधानमन्त्री पुष्पकमल दाहाल र अर्थमन्त्री वर्षमान पुनले नेपालको आसन्न लगानी सम्मेलनमा भाग लिन आह्वान गरेको सन्देशमूलक भिडियो प्रस्तुत गरिएको थियो । सेमिनारमा बंगलादेशका सांसद, उच्चपदस्थ सरकारी अधिकारी, उद्योगी–व्यवसायीलगायतको उपस्थिति रहेको थियो ।
