सबै उद्योगले बुझाउन थाले बक्यौता प्रिमियम महसुल, सबैमा जोडियो लाइन (सूचीसहित)

काठमाडौँ । नेपाल विद्युत् प्राधिकरणबाट लोडसेडिङको समयमा डेडिकेटेड फिडर तथा ट्रंक लाइनबाट विद्युत् सेवा लिएका सबैजसो उद्योगले प्रिमियम दरको बक्यौता महसुल बुझाउन थालेका छन् । कुल बक्यौता महसुललाई २८ किस्तामा विभाजन गरी बुझाउन पाउने सुविधा अनुसार सबै उद्याेगले बक्यौता बुझाउन थालेका हुन् । बक्यौताको पहिलो किस्ता बुझाएपछि लाइन ती उद्योगमा कात्तिक ४ र ८ गते काटिएका २२ उद्याेगमा समेत विद्युत् आपूर्ति सुचारु गरिएको प्राधिकरणका प्रवक्ता राजन ढकालले ऊर्जा खबरसँग बताए ।

‘लाइन काटिएका २५ मध्ये एभरेस्ट पेपर मिल र बुटवल सिमेन्ट पहिलेदेखि नै बन्द रहेको र नियमित महसुल समेत नतिरेकोले आपूर्ति बन्द गरिएको थियो,’ उनले भने, ‘निगाले सिमेन्टको भने उद्योगको ट्रान्सफर्मर बिग्रिएका कारण विद्युत् आपूर्ति पहिल्यैदेखि बन्द थियो भने अहिले उद्योग उद्योग नै बन्द रहेको छ ।’

उनका अनुसार प्राधिकरणले असोज १२ गते नै २१ दिनको समय दिएर बक्यौता प्रिमियम महसुल नतिरे लाइन काट्ने सूचना दिएको थियो । उक्त सूचनापछि विद्युत् लाइन नकाटिँदै हुलास स्टील, अशोक स्टील, हामा आइरन एन्ड स्टील, सर्वोत्तम सिमेन्टलगायत १३ उद्योगले बक्यौताको पहिलो किस्ता बुझाएर विद्युत् सेवा सुचारु नै राखेका थिए । उक्त सूचनाअनुसार बक्यौता बुझाउन नआएका उद्योगको भने लइन काटिएपछि बक्यौता तिर्न सुरु गरेका हुन् । सरकारको स्वामित्वमा रहेका हेटौँडा सिमेन्ट र उदयपुर सिमेन्टले भने यसअघि नै बक्यौता तिर्ने प्रतिबद्धता जनाएका कारण लाइन सुचारु नै राखिएको थियो ।

उद्योगहरूले २०७२ माघदेखि २०७५ वैशाखसम्म लोडसेडिङका बेला प्रिमियम सुविधामा उपभोग गरेको विद्युत्‌को बक्यौता प्रिमियम महसुल बुझाउन थालेका हुन् । उद्योगहरूले बक्यौता रकमको पहिलो किस्ता बुझाएपछि अब प्राधिकरणको छुट बिलप्रति चित्त नबुझेका उद्योगले न्यायिक निरूपणका लागि प्रशासनिक पुनरावलोकन तथा अदालतमा जाने बाटोसमेत खुलेको छ ।

लाइन काटिएपछि बक्याैता बुझाउन थालेका उद्याेगको सूची