ऊर्जा खबर
काठमाडौं । नेपाल विद्युत प्राधिकरणले नयाँ मोदी–लाहाचोक १३२ केभी डबल सर्किट प्रसारण लाइन सञ्चालन गरेको छ । नयाँ मोदी– लेखनाथ प्रसारण लाइन अन्तर्गत पर्वतको मोदीदेखि कास्कीको लाहाचोकसम्म निर्माण सम्पन्न भएको २१ किलोमिटर खण्ड बुधबारबाट सञ्चालनमा आएको हो ।
लाहाचोकमा निर्माण भएको १३२/३३ केभी सबस्टेसनमा ३० एमभिएको पावर ट्रान्सफर्मर जडान गरी प्रसारण लाइन सञ्चालनमा ल्याइएको हो । यो सबस्टेसनबाट कास्कीको माच्छापुच्छ्रे र अन्नपूर्ण गाउँपालिकामा विद्युत आपूर्ति गरिने प्राधिकरणले जनाएको छ ।
प्रसारण लाइन र सबस्टेसन निर्मण सम्पन्न भई सञ्चालनमा आएसँगै त्यस क्षेत्रको विद्युत वितरण प्रणालीको गुणस्तरमा सुधार भई सेवा दिगो र गुणस्तरीय हुने प्राधिकरणका कार्यकारी निर्देशक कुलमान घिसिङले बताए । ‘यो भन्दा पहिला पोखराबाट लगिएको लाइनबाट माछापुच्छ्रे र अन्नपूर्णमा विद्युत आपूर्ति हुँदै आएको थियो,’ उनले भने, ‘लाइन लामो हुँदा ट्रिपिङ, लो भोल्टेज लगायतका धेरै समस्या थिए । अब लाहाचोक सबस्टेशनबाटै त्यस क्षेत्रमा विद्युत आपूर्ति सुरु भएकाले ती समस्याको समाधान भएको छ ।’
उनले अब त्यस क्षेत्रका ग्राहकले पाउने विद्युत सेवा दिगो र गुणस्तीय हुनुका साथै प्राविधिक चुहावट पनि कम हुने बताए । प्रसारण लाइन आयोजना अन्र्तगत नयाँ मोदी– लेखनाथ खण्डमा ६८ वटा टावर निर्माण गरिएको छ । २१ किलोमिटर तार तानिएको छ ।
एक्जिम बैंक अफ इण्डियाको सहुलियतपूर्ण ऋण लगानीमा निर्माण गरिएको प्रसारण लाइन आयोजना अन्र्तगत लाहाचोक–लेखनाथ खण्ड निर्धाणाधीन छ । नयाँ मोदी–लाहाचोक खण्ड निर्माण सम्पन्न भई सञ्चालनमा आए पनि स्थानीय अवरोध र वन क्षेत्रको समस्याका कारण लाहाचोक–लेखनाथ खण्डको निर्माण प्रभावित हुँदै आएको आयोजना प्रमुख रोशन अग्रवालले बताए ।
प्राधिकरणले प्रसारण लाइन आयोजना निर्माणको काम सन् २०१८ जुलाई २१ बाट सुरु गरेको थियो । एउटा खण्ड सञ्चालनमा आइसके पनि अर्को खण्ड पूरा भई सञ्चालनमा आउन समय लाग्ने देखिएको छ ।
.jpg)
