ऊर्जा खबर
काठमाडौै । नेपाल विद्युत प्राधिकरण कञ्चनपुर वितरण केन्द्रले लामो समयसम्म विद्युत महशुल तिर्न अटेर गरेका ग्राहकको लाइन काटी साढे २ करोड रुपैयाँ बढी विद्युत महसुल बक्यौता उठाएको छ । केन्द्रले आर्थिक वर्ष २०७८/७९ मा महसुल नतिर्ने ९७८ ग्राहकको लाइन काटेको हो ।
लाइन काटिएका ग्राहकमध्ये ६२५ जनाले २ करोड ६५ लाख ५५ हजार ७ सय ४८ रुपैयाँ महसुल बुझाएपछि उनीहरुको लाइन पूर्न जोडिएको वितरण केन्द्रका प्रमुख संजीव साहले बताए । उनका अनुसार बाँकी ३५३ जनाले जरिवाना सहितको बक्यौता बुझाएपछि लाइन जोडिने छ ।
केन्द्रका अनुसार लाइन काटिएका ९७८ ग्राहकबाट ४ करोड ८४ लाख ८३ हजार ९ सय ९७ रुपैयाँ महशुल उठाउन बाँकी रहेको थियो । यसमध्ये ६२५ जनाले जरिवानासहितको महसुल बुझाएपछि लाइन पूर्न जोडिएको छ ।
यस्तै, अघिल्लो आव २०७७/७८ मा पनि ६१ जना ग्राहकको लाइन काटिएको साहले बताए । लाइन काटेका ग्राहकबाट ५९ लाख ४ हजार ६२ रुपैयाँ बक्यौता उठानउ बाँकी थियो ।
लाइन काटिएका ग्राहकमध्ये २३ जनाले १६ लाख २० हजार २ सय ९१ रुपैयाँ महसुल बुझाएपछि लाइन पून जोडिएको केन्द्रले जनाकारी दिएको छ । केन्द्रले बारम्बार ताकेता गर्दा पनि महसुल नबुझाउने ग्राहकको लाइन काट्ने कामलाई तीव्र गतिमा अघि बढाएको छ ।
