चाडपर्वमा विद्युत प्रवाहमा कमजोरी हुन नदिन ऊर्जामन्त्रीको निर्देशन

काठमाडौं । ऊर्जा, जलस्रोत तथा सिँचाइ मन्त्री पम्फा भुसालले चाडवाडको समयमा विद्युत प्रवाहमा कुनै कमजोरी हुन नदिन नेपाल विद्युत प्राधिकरणलाई निर्देशन दिएकी छन् । नेपालीका चाडपर्व सुरु हुन लागेको अवस्थामा कुनै समस्या आउन नदिन बताएकी हुन् ।

आज (असोज १४ गते) प्राधिकरणका उच्च तहका कर्मचारीलाई मन्त्रालयमा बोलाएर जनताको हितमा काम गर्न निर्देशन दिइन् । ‘जनतालाई दिने सेवाप्रति कर्तव्यबोध गर्नुपर्छ,’ उनले भनिन्, ‘जुनसुकै समयमा सेवाको गुणस्तरीयता घट्नु भएन ।’ केही बेर पनि विद्युत गयो भने जनतामा निराशा पैदा हुने उल्लेख गर्दै यस्तो हुन नदिन उच्च सतर्कता अपनाउन आग्रह गरिन् ।

सोही अवसरमा प्राधिकरणका कार्यकारी निर्देशक कुलमान घिसिङले कर्मचारीहरू जस्तोसुकै असहज परिस्थितिमा पनि सेवामा लागिरहेको र यस्ता चाडपर्वका समयमा अझै सक्रियता अपनाउने बताए ।