ऊर्जा खबर
काठमाडाैँ । भाेटेकाेसी बाढीपहि लेदाेले पुरिएको ६० मेगावाटको माथिल्लो त्रिशूली–३ ‘ए’ जलविद्युत् आयोजनाको सुरुङकाे मुख पत्ता लागेको छ । सुरुङमा फसेका कर्मचारी तथा कामदारहरूको उद्धार कार्यमा जुटेको प्राविधिकसहितको टाेलीले सुरुङको भित्री भागमा रहेको ठाडो प्वाल (भर्टिकल होल) भन्दा करिब ४० मिटर माथिल्लो क्षेत्रमा उत्खनन गर्दै जाँदा करिब ८ मिटर तल सुरुङको मुख पहिचान गरेको हो ।
सुरुङको मुख पुरिएको स्थान पहिचान भएसँगै त्यहाँ पुग्न तथा अवरुद्ध संरचना हटाउन आवश्यक पहल सुरु गरिएको छ । उद्धार कार्यलाई तीव्रता दिँदै अब सुरुङको मुखसम्म पुगेर सुरक्षित रूपमा अवरोध हटाउने काम अघि बढाइने जनाइएको छ ।
यसअघि सुरुङको मुख पुरिएर पत्ता लगाउन नसकिएपछि विद्युत्गृहभित्र फसेका कर्मचारी तथा कामदारहरूको उद्धार जटिल बनेको थियो । नेपाल विद्युत् प्राधिकरणको तदारुकता तथा सरकारी निकायहरूको समन्वयमा नेपाली सेना र दक्ष प्राविधिक जनशक्तिसहित आवश्यक उत्खनन उपकरण परिचालन गरी उद्धार कार्य निरन्तर अघि बढाइएको छ ।
भौगोलिक जटिलता र आयोजनास्थलको कठिन अवस्थाका बाबजुद स्थानीय प्रशासन तथा उद्धार टोलीले शुक्रबारदेखि हेलिकप्टरमार्फत डोजर तथा अन्य आवश्यक उपकरण प्रभावित क्षेत्रमा पुर्याएर उत्खनन थालेका थिए ।
