ऊर्जा खबर
काठमाडौँ । दार्चुलामा २ मेगावाटको थालिगाड साना जलविद्युत् आयोजना निर्माण हुने भएको छ । त्रिकाल पावर कम्पनी प्रालिले महाकाली नगरपालिकामा आस्थित थालीगाड खोलामा उक्त आयोजना निर्माण गर्न लागेको हो ।
विद्युत् विकास विभागको सूचना अनुसार आयोजनाको सम्भाव्यता अध्ययन प्रतिवेदन र प्रारम्भिक वातावरणीय मूल्याङ्कन प्रतिवेदन तयार भइसकेको छ । अध्ययन अनुसार आयोजनाको मुख्य भौतिक संरचना बाँध महाकाली नगरपालिका–६ मा रहने छ । अन्य सबै संरचना वडा नम्बर ६ र ७ मा रहने छन् ।
आयोजनाको विद्युत्गृहमा रहने १ मेगावाट दरका २ वटा उत्पादन युनिटबाट वार्षिक औसत १३.३१४ गिगावाट आवर इनर्जी उत्पादन हुने छ । उत्पादित बिजुली १ किलोमिटर लामो ३३ केभी लाइन मार्फत नेपाल विद्युत् प्राधिकरणको धाप सबस्टेसनमा जोडिने छ ।
आयोजनाबाट २०८३ बैशाख १० गते सम्ममा विद्युत् उत्पादन गर्ने लक्ष्य राखिएको छ ।
