यसपाली नदीको बहाब निकै घटे पनि विद्युत् माग व्यवस्थापन गर्न सकिएको छः उपकार्यकारी निर्देशक तिम्सिना

काठमाडौँ । यसपालीको सुख्खायाममा नदीको बहाब (डिस्चार्ज) निकै घटे पनि विद्युत् व्यवस्थापन गर्न सकिएको नेपाल विद्युत् प्राधिकरणका उपकार्यकारी निर्देशक मदन तिम्सिनाले जानकारी दिएका छन् । उनका अनुसार हाल विद्युत्को उच्च माग २०५० मेगावाट पुगे पनि करिब १६०० मेगावाट आन्तरिक उत्पादनले धानेको छ । अपुग बिजुली भारतबाट आयत गरेर यसपाली सुख्खायामको माग व्यवस्थापन गर्न सकिएको उनको भनाइ छ । 

केही दिनयता आंशिक जलाशय आयोजना कालीगण्डकी ए, मर्स्याङ्दी, माथिल्लो त्रिशूली ३ए, मोदी लगायतका आयोजनाबाट पूर्ण क्षमतामा विद्युत् उत्पादन हुन थालिसकेको छ । कुलेखानी जलाशय आयोजनालाई सुखायामामा अधिकतम उपयोग गरिएकोले पनि माग व्यवस्थापनमा सहज भएको उनको भनाइ छ । हाल कुलेखानीको जल सतह नै १४९२ मिटरमा खुम्चिसकेको समेत उनले जानकारी दिए । 

प्राधिकरणको भार प्रेषण केन्द्र र विद्युत् व्यापार विभागको तथ्याङ्क अनुसार २०८१ वैशाख मसान्तसम्म निजी क्षेत्रका जलविद्युत् आयोजनाको जडित क्षमता १८९० मेवा पुगेको छ । प्राधिकरणको जलविद्युत् आयोजनाको जडित क्षमता ५८३ मेवा, सहायक कम्पनीहरुको क्षमता ४९३ मेवा पुगेको छ । 

निजीसहितको कुल सौर्य ऊर्जा उत्पादन क्षमता ११६ मेवा, प्राधिकरणको डिजेल प्लान्टको क्षमता ५३ मेवा र बगास ६ मेवा गरी ग्रिडमा कुल विद्युत् जडित क्षमता ३१४१ मेवा पुगेको छ।