ऊर्जा खबर
काठमाडौं । निर्माणाधीन २२० केभी हेटौंडा–भरतपुर–बर्दघाट प्रसारण लाइनको भरतपुर–बर्दघाट खण्ड आगामी असारदेखि सञ्चालनमा आउने भएकाे छ । निर्माण अन्तिम चरणमा पुगेकाे प्रसारण लाइन अबकाे साढे ३ महिनाभित्र सञ्चालनमा आउन लागेकाे हाे ।
नेपाल विद्युत प्राधिकरणले निर्माण गरिरहेकाे याे खण्ड ९० प्रतिशत पूरा भइसकेकाे आयोजना प्रमुख नरेश कुमार खड्काले बताए । ‘चीतवनकाे भरतपुरदेखि नवलपरासीकाे बर्दघाटसम्म पर्ने ७४ किलोमिटर लामाे यस खण्डमा २ सय ४६ वटा टावर निर्माण हुँदैछन् । जसमध्ये २ सय ४४ वटा टावरकाे जग (फाउन्डेसन) तयार भइसकेको छ,’ उनले ऊर्जा खबरसँग भने, ‘२ सय ३५ वटा टावर खडा भइसकेका छन् ।’
उनले अब प्रसारण लाइनकाे ९ वटा टावर खडा गर्न बाँकी रहेकाे बताए । अहिलेसम्ममा योे खण्डमा ३३ किलोमिटर तार तान्ने काम पनि सकिएकाे उनले जानकारी दिए। बाँकी ३१ मिटर तार तान्ने काम असारभित्र पूरा अबकाे ३ महिनामा पूरा गरेर प्रसारण लाइन सञ्चालनमा ल्याउने तयारी छ ।
प्रसारण लाइनकाे याे खण्ड यसअघि नै सञ्चालनमा आइसक्नु पर्ने भए पनि कोरोना (कोभिड–१९) महामारीकाे असरले काम प्रभावित हुँदा धकेलिएकाे उनले बताए ।
यस्तै, प्रसारण लाइनको हेटौंडा–भरतपुर खण्डमा निर्माण हुने २ सय २६ टावरमध्ये १ सय ८३ वटाको फाउन्डेसन सकिएकाे छ । १ सय १९ वटा टावर खडा गरिएको छ । ५ ठाउँमा भने काम भइरहेको छ । १०.५ किलोमिटर तार तान्ने काम सम्पन्न भएको पनि उनले बताए ।
हेटौंडा–भरतपुर र भरतपुर–बर्दघाट गरी २ खण्डमा निर्माण भइरहेको प्रसारण लाइनको काम सन्तोषजनक नभएको भन्दै प्राधिकरणले भारतीय र चिनियाँ ठेकेदारसँगको सम्झौता तोडेको थियो । सम्झौता तोडिएपछि लामो समय प्रसारण लाइनको निर्माण रोकिन पुगेको थियो ।
हेटौंडा–भरतपुर खण्डको ठेक्का भारतीय कम्पनी आइकम टेल र भरतपुर–बर्दघाट खण्डमा चिनियाँ सेन्टरल पावर ग्रिड (सिसिपिजी) ठेकेदारसँगको ठेक्का तोडिएको थियो । अहिले पनि हेटौंडा–भरतपुर खण्डमा भारतीय र भरतपुर–बर्दघाट खण्डमा चिनियाँ कम्पनीले ठेक्का पाएका छन् ।
पहिलो पटक २०६५ सालमा ठेक्का सम्झौता गरेर २०६६ सालमा प्रसारण लाइनको काम सुरु गरिएको थियो । ठेक्का सम्झौताअनुसार २०६९ मा प्रसारण लाइन सम्पन्न गर्ने तालिका थियो ।
प्रसारण प्रणाली दिगो र गुणस्तरीय बनाउन यो प्रसारण लाइन निर्माण भइरहेको हो । प्रसारण लाइन निर्माण गर्न विश्व बैंकले ऋण लगानी गरेको छ ।
.jpg){kind=spacer}
