स्थानीयले मोदी इनर्जीको सेयर आवेदन दिने आज अन्तिम दिन

काठमाडौं । मोदी इनर्जी लिमिटेडको सेयर आवेदन दिने आज (चैत १६ गते) अन्तिम दिन हो । कम्पनीले आयोजना प्रभावित स्थानीयका लागि निष्कासन गरेको सेयर आवेदन अवधि आज साँझ ५ बजेबाट सकिन लागेको हो ।

कम्पनीले स्थानीय र वैदेशिक रोजगारीमा रहेका नेपालीका लागि गत फागुन २५ गतेदेखि सेयर निष्कासन गरेको थियो । वैदेशिक राेजगारीमा रहेका नेपालीहरूकाे सेयर आवेदन अवधि चैत ९ गते नै सकिएकाे हाे । कम्पनीले जारी पूँजी २ अर्ब ९० करोड मध्येको २५ प्रतिशत हुन आउने अर्थात ७२ करोड ५० लाख कित्ता साधारण सेयरमध्येको १० प्रतिशत अर्थात २९ करोड रकम बराबरको सय रुपैयाँ अंकित २९ लाख कित्ता साधारण सेयर निष्कासन गरेको कम्पनीले जनाएको छ ।

कम्पनीका अनुसार आयोजना प्रभावित पर्वत जिल्ला अन्तर्गत दुर्लुङग् गाविस हाल कुश्मा नगरपालिका ३, बाजुङ्ग गाविस हाल मोदी गाउँपालिका ५, देवापुर गाविस हाल मोदी नगरपालिका २, तिलहर गाविस हाल मोदी गाउँपालिका ६ र चुवा गाविस हाल कुश्मा नगरपालिका ८ का स्थानीय बासिन्दाहरुका लागि निष्कासन गरिएको हो ।

बाँकी १५ प्रतिशत हुन आउने अर्थात ४३ करोड ५० लाख रकम बराबरको सय रुपैयाँ अंकित ४३ हजार  ५० कित्ता सेयर मध्येको २० प्रतिशत अर्थात ४ लाख ३५ हजार कित्ता वैदेशिक रोजगारीमा गएका नेपाली नागरिकका लागि, ५ प्रतिशत हुन आउने अर्थात २ लाख १७ हजार ५ सय कित्ता सेयर सामुहिक लगानी कोषका लागि छुट्याएको र २ प्रतिशत हुन आउने अर्थात ८७ हजार कित्ता सेयर कम्पनीका कर्मचारकिा लागि छुट्याएको छ । बाँकी, ३६ लाख १० हजार ५ सय कित्ता साधारण सेयर सर्वसाधारणका लागि निष्कासन गरिनेछ ।

स्थानीय र वैदेशिक रोजगारीमा गएका नेपाली नागरिकले न्यूनतम १० कित्ता देखि अधिकतम १० हजार कित्ता सम्म आवेदन दिन पाउनेछन् । कम्पनीको सेयर निष्कासन गरी बाँडफाँड गर्न सनराइज क्यापिटल लिमिटेडलाई बिक्री प्रबन्धक नियुक्त गरेको छ । कम्पनीको पार्वतमा २० मेगावाटको तल्लो मोदी खोला जलविद्युत आयोजना सञ्चालनमा छ ।