तल्लो इन्द्रावतीको इलेक्ट्रो मेकानिकलको काम बिएफएलले गर्ने

काठमाडौं । नेशनल हाइड्रो पावर कम्पनी लिमिटेडले निर्माण गरिरहेकाे तल्लो इन्द्रावती जलविद्युत आयोजनाको इलेक्ट्रो मेकानिकलतर्फको ठेक्का भारतीय कम्पनी बिएफएल हाइड्रोले पाएको छ । सिन्धुपाल्चोकमा अघि बढाइएको ४.५ मेगावाटको आयोजनाको इलेक्ट्रोमेकानिकलको काम भारतीय कम्पनीले गर्ने भएको हो ।

प्रवर्द्धक कम्पनी र भारतीय कम्पनीबिच सोमबार (भदौ ११ गते) ठेक्का सम्झौता भएको छ । सम्झौताअनुसार बिएफएलले इलेक्ट्रोमेकानिकल तर्फ उपकरणको डिजाइन, इन्जिनियरिङ, उत्पादन, ढुवानी, जडान, परिक्षण र सञ्चालनसम्मको कार्य गर्नेछ ।

यो आयोजना यसअघि करिब ४० प्रतिशत निर्माण सम्पन्न भइसकेपछि अनुमतिपत्र खारेज गरेर सरकारको बास्केटमा राखिएको थियो । आयोजना निर्माण गरी सञ्चालन हुने अवधिभरका लागि ६२ करोड रुपैयाँ तिर्ने गरी २०७८ असारमा नै अनुमतिपत्र पुरानै कम्पनीलाई दिने आशयपत्र (लेटर अफ इन्टेन्ट–एलओआइ) जारी गरेको थियो ।

आशयपत्र जारी भएपछि कुनै कम्पनी दाबी विरोध गर्न नआएपछि नेशनल हाइड्रोले अनुमतिपत्रका लागि विभागमा आवेदन दिएको थियो । विभागले आवेदन दिएपछिको प्रक्रिया पूरा गरेर कम्पनीको नाममा आयोजनाको अनुमतिपत्र जारी गरी निर्माण गर्न बाटो खोलिदिएको थियो । कम्पनीले अध्ययन पूरा गरेर पनि विभागबाट २०८० बैशाख २० गते उत्पादन अनुमति पाएकाे छ ।

बागमती प्रदेश अन्तर्गत  सिन्धुपाल्चोक जिल्लाको मेलम्ची नगरपालिकामा रहेको इन्द्रावती तेस्रो जलविद्युत आयोजनाको टेलरेसबाट निस्केको पानीको प्रयोग गरी सोही खोलाको दायाँ किनारमा मुख्य संरचनाहरू रहने गरी डिजाइन तयार पारिएको छ ।

यस आयोजनाबाट वार्षिक सरदर २९.९८ गिगावट घन्टा विद्युत उत्पादन हुनेछ । विद्युतगृहमा जडित २ वटा फ्रान्सीस टर्वाइन (२.३५मेगावाट) र २ वटा ३ फेज जेनेरेटर (२.६५ मेगावाट) मार्फत ४.५ मेगावाट विद्युत उत्पादन गरिनेछ र त्यहाँबाट निस्केको पानीलाई ५० मिटर लामो टेलरेसबाट पुन इन्द्रावती खोलामा छाडिनेछ ।

आयोजनाबाट उत्पादित विद्युत नेपाल विद्युत प्राधिकरणको २०० मिटर लामो ६६ केभी सिंगल सर्किट प्रसारण लाइन मार्फत पाँचखाल सबस्टेसनमा जाडिनेछ । आयोजनाको विद्युत् खरिद सम्झौता (पिपिए) र कनेक्सन एग्रिमेन्ट (प्रसारण सम्झौता) सम्पन्न भइसकेको छ ।