ऊर्जा खबर
काठमाडौँ । नेपाल विद्युत् प्राधिकरणले ३८.२६७ किलोमिटर लामो लामोसाँघु–काभ्रे/रामेछाप १३२ केभी विद्युत् प्रसारण लाइन निर्माण गर्ने भएको छ । कम्पनीले जिल्लाको सुनकोसी गाँउपालिका वडा–७ मा प्रस्तावित लामोसाँघु सबस्टेसनदेखि रामेछाप जिल्लाको खाँडादेवी गाँउपालिका वडा–१ मा प्रस्तावित राकाथुम सबस्टेसनसम्म डबल सर्किटकाे साे प्रसारण लाइन निर्माण हुने भएको हो ।
आयोजनाबाट २३८ मेगावाटसम्म विद्युत् प्रसारण हुनेछ । आयोजना अन्तर्गत प्रस्तावित लामोसाँघु सबस्टेसनमा २ वटा लाइन बे एक्सटेन्सन र प्रस्तावित राकाथुम १३२/३३ केभी, ३०–३० क्षमताको ६० एमभिए ३३/११ केभी, ८–८ क्षमताको १६ एमभिएको सबस्टेसन निर्माण गरिने छ ।
उक्त प्रसारण लाइनमा १२९ वटा टावर निर्माण हुने तथा एसिआर ‘वियर कन्डक्टर’ जडान गरिने छ । टावरको अधिकतम उचाइ ४० मिटरसम्म रहने छ र टावरहरको औषत दूरी २९८.९७ मिटर रहने छ । आयोजना निर्माणका लागि कुल ४०.०८ हेक्टर जमिन आवश्यक पर्ने छ ।
जसमध्ये १२९ वटा टावरहरुका लागि स्थायी रूपमा ४.५८५ हेक्टर जग्गा आवश्यक पर्ने छ । यसबाहेक विद्युत् मार्गको अधिकार क्षेत्रभित्र (राइट अफ वे) अन्तर्गत २७.८७ हेक्टर जग्गा आयोजना निर्माणका लागि चाहिने छ । कम्पनीले उक्त आयोजनाको निर्माण कार्य करिब २ वर्षभित्र सम्पन्न गर्ने लक्ष्य राखेकाे छ ।
.jpg)
