ऊर्जा खबर
काठमाडौं । सरकारले सुनकोसी–मरिन डाइभर्सन (नदी पथानान्तरण) बहुउद्देश्यीय आयोजना विकास गर्न २ अर्ब ४६ करोड रुपैयाँ बजेट विनियोजन गरेको छ । अर्थ मन्त्री विष्णुप्रसाद पौडेलले शनिबार सार्वजनिक गरेको आर्थिक वर्ष २०७८/७९ को बजेटमार्फत उक्त बजेट विनियोजन गरेको घोषणा गरेका हुन् ।
सरकारले चालू आव २०७७/७८ मा समेत उक्त आयोजनालाई त्यति नै बजेट विनियोजन गरेको थियो । सुनकोसी नदीको पानी मरिनमा खसालेर सिँचाइ तथा जलविद्युत् उत्पादन गर्ने उद्देश्यले निर्माण प्रक्रिया अगाडि बढाइएको छ । केही महिना अगाडि प्रधानमन्त्री केपी शर्मा ओलीले आयोजना निर्माणको शिलन्यास गरेका थिए ।
सरकारले आव २०७६/७७ मा सुनकोसी–मरिनलाई २ अर्ब ५ करोड रुपैयाँ विनियोजन गरेको थियो ।
मरिन बागमती नदीको सहायक खोला हो । सुनकोसीबाट मरिनमा पानी खसालेपछि त्यो बागमतीमै मिसिन्छ । र, बारा, रौतहट, सर्लाही र महोत्तरीमा १ लाख २२ हजार हेक्टर जमिनमा सिँचाइ पुर्याउने लक्ष्य छ ।
सुनकोसीको पानी १३ किलोमिटर सुरुङ खनेर मरिनमा झारी ४३ मेगावाट विद्युत् उत्पादन हुने अध्ययनले देखाएको छ । आयोजना निर्माण पूरा गर्न ६९ अर्ब रुपैयाँ लाग्ने अनुमान छ ।
