निशेधाज्ञा अवधिभर मासिक २० युनिट विद्युत खपत गर्ने ग्राहकले महसुल तिर्नु नपर्ने

काठमाडाैं। सरकारले निशेधाज्ञा अवधिभरका लागि मासिक २० युनिट विद्युत खपत गर्ने घरायसी तथा साना ग्राहकबाट   विद्युत महसुल नलिने भएको छ । अर्थमन्त्री विष्णु पौडेलले आर्थिक वर्ष २०७८/७९ को बजेट सार्वजनिक गर्दै २० युनिट मात्रै विद्युत खपत गर्ने ग्राहकलाई शतप्रतिशत महसुल छुट दिने घोषणा गरेका हुन् ।

यस्तै, १५० युनिटसम्म विद्युत खपत गर्ने ग्राहकले पनि ५० प्रतिशत छुट पाउने छन् । २५० युनिटसम्म विद्युत खपत गरेका ग्राहकले विद्युत महसुलमा ३० प्रतिशत छुट पाउने मन्त्री पोडेलले बताए ।

यसैगरी, उत्पादन मुलक उद्योग, होटल तथा चलचित्र उद्योगलाई पनि निशेधाज्ञा अवधिभरका लागि विद्युतको डिमाण्ड शुल्कमा छुट दिइएको छ । साभेदारी, सहलगानी तथा सबै प्रकारका खानेपानी एवं सिँचाइ उपभोक्ता समितिले तिर्नुपर्ने विद्युतको डिमाण्ड शुल्क र विद्युत महसुलमा शतप्रतिशत छुटको घोषणा बजेटमा गरिएको छ ।