ऊर्जा खबर
काठमाडौं । सङ्खुवासभामा निर्माणाधीन ९०० मेगावाटको अरुण तेस्रो जलविद्युत् आयोजनाको काम सातादिनदेखि ठप्प भएको छ । छयाङकुटी–पुखुवा सडकखण्डका स्थानीयले मुआब्जा नपाएको भन्दै अनिश्चितकालीन सडक बन्द गरेपछि आयोजनाको काम ठप्प भएको हो ।
आयोजनाको प्रवेशमार्ग छयाङकुटी–पुखुवा सडकखण्डको मुआब्जा नपाएपछि सात दिनदेखि आयोजना र प्रवेशमार्ग अवरुद्ध पारेको सङ्घर्ष समितिका अध्यक्ष हर्कसिंह राईले बताए । उनका अनुसार सडकखण्डको मुआब्जा तीन वर्ष बित्दासमेत नपाएपछि बाध्य भएर प्रवेशमार्ग र आयोजनाको विद्युतगृहको काम अवरुद्ध बनाइएको छ । पहिले १५ मिटरको मुआब्जा दिएर आयोजनाले अहिले ३० मिटर जग्गा अधिग्रहण गरेको पनि राईले बताए ।
आयोजनाको करिब ५० प्रतिशतमाथि काम भइसक्दा पनि मुआब्जा नपाएपछि स्थानीयवासीले गत (२०७८) चैत ८ गतेबाट प्रवेशमार्गको बन्द र विद्युतगृहको काम ठप्प पारेर आन्दोलनमा उत्रिएको राईले बताए । प्रवेशमार्गका स्थानीयवासीले गत मंगलबारदेखि भौतिक निर्माणका काम बन्द गरिदिएका छन् ।
छ्याङकुटीबाट विद्युतगृहस्थल दिदिङसम्मको मुआब्जा विवाद केही वर्षदेखि कायम छ । यो खण्डमा सरकारी मूल्यअनुसार मुआब्जाको रकम नदिएपछि स्थानीयवासीले सडक र काम ठप्प बनाएका हुन् । यस क्षेत्रका २०० परिवारले मुआब्जा नपाएको पीडितको गुनासो छ ।
आयोजनाको विद्युतगृह निर्माणको काम भारतको पटेल इञ्जीनियरिङ कन्सल्टेन्सी कम्पनीले गरिरहेको छ । छयाङकुटी–पुखुवा मुआब्जा सङ्घर्ष समिति र अरुण तेस्रो सरोकार समितिले यसअघि नै पटक–पटक मुआब्जाका विषयमा सरोकारवाला निकायलाई ध्यानाकर्षण गराए पनि सुनुवाइ नभएको स्थानीयबासीको भनाई छ । छयाङकुटी–पुखुवा सडकखण्ड २८.५ किलोमीटर छ ।
एक खर्ब ४४ अर्ब लागत अनुमान गरिएको आयोजनाको काम २०२४ भित्र उत्पादन सुरु गर्ने लक्ष्य रहेको छ । आयोजनाको निर्माणको काम भारतीय सतलज जलविद्युत् निगम (एसजेभिएन) ले गरिरहेको छ । मकालु गाउँपालिका–५ फ्याक्सिन्दा दोभानमा बाँधस्थल र चिचिला गाउँपालिका–२ दिदिङ पुखुवामा पावरहाउस निर्माण भइरहेको छ ।
