ऊर्जा खबर
काठमाडौं । नेपाल विद्युत प्राधिकरणले ३३/११ केभी खुर्कोट सबस्टेसन चार्ज गरेको छ । सिन्धुली जिल्लाको विद्युत आपुर्ति गुणस्तर सुधार तथा स्तरोन्नति गर्ने उदेश्यले निर्माण भएको सबस्टेसन मंगलबार (आज) देखि चार्ज भएको हो ।
विश्व बैंकको सहयोगमा ग्रीड सोलार तथा इनर्जी इफीसिएन्सी आयोजना अन्तर्गत निर्माण सम्पन्न भएको सबस्टेसन चार्ज गरिएको सहायक प्रबन्धक प्रकाश रावतले बताए । उनका अनुसार आजदेखि सबस्टेसन नो लोडमा चार्ज गरिएको छ ।
उद्योग र घरयासी ग्राहकले पाउने विद्युत सेवाको गुणस्तर सुधार तथा भोल्टेज र प्रणाली स्तरोन्नति गर्न सबस्टेसन निर्माण गरी सञ्चालनमा ल्याएको रावतले जानकारी दिए ।
सबस्टेसन चार्ज भएपछि खुर्कोट आसपासको भोल्टेज सुधार, ट्रिपिङ घट्ने, चुहावट घट्ने साथै विद्युत बिक्री बढ्नेछ । सबस्टेसनमा ३ एमभीएको ट्रान्सर्फमर जडान गरिएको छ । सबस्टेसनमा ३ वटा फिडर निकालिएको छ । यसअघि सिन्धुली सबस्टेसनदेखि विद्युत ल्याएर वितरण भइरहेको थियो ।
आयोजनाको काम २ वर्षअघिदेखि सुरु भएको थियो । आयोजना सम्पन्न गर्न करिब १० करोड रुपैयाँ खर्च भएको छ । सबस्टेसनको काम एटुचेट इन्फ्राइस्ट्रकचर इन्जिनियरीङको सब कन्ट्रयाक्टर त्रिपुरेश्वर जयदुर्गे इन्जिनियरीङ जेभीले गरेको हो ।
बैंकको सहयोगमा ग्रीड सोलार तथा इनर्जी इफीसिएन्सी आयोजना अन्तर्गत सञ्चालनमा आएको यो तेस्रो सबस्टेसन हो । यो आयोजना अन्तर्गत करिब २१ वटा सबस्टेसन निर्माण हुनेछन् ।
यसअघि कपिलवस्तुको लवानी र गोरुसिङ्गे सबस्टेसन सञ्चालनमा आइसकेको छ । आगामी १५ दिनभित्र रामेछापको दोरम्बा र अर्घाखाचीको हंसपुर सबस्टेसन सञ्चालन गरिनेछ ।
