ऊर्जा खबर
काठमाडौं । हाइड्रो इलेक्ट्रिसिटी इन्भेष्टमेन्ट एन्ड डेभलपमेन्ट कम्पनी लिमिटेड (एचआईडीसीएल) ले करिब २ करोड २२ लाख कित्ता हकप्रद सेयर लिलामी गर्न लागेको छ । कम्पनीले बोलकबोलमार्फत सेयर बिक्री गर्न लागेको हो ।
२ करोड २१ लाख ९७ हजार ३ सय २५ कित्ता हकप्रद सेयर बोलकबोलबाट बिक्री गर्ने तयारी गरेको कम्पनीले जनाएको छ । कम्पनीका अनुसार बोलकबोलमार्फत माघ २२ गतेदेखि आवेदन खुल्ला गर्ने तयारी भइरहेको छ । इच्छुकले न्यूनतम १०० कित्ता र अधिकतम सबै खरिद गर्न सक्ने कम्पनीले जनाएको छ । आवेदकले फागुन ८ गतेसम्म बाेलपत्र पेस गर्न सक्नेछन् ।
कम्पनीले हालसम्म कुल १८११ मेगावाट क्षमताका २६ वटा जलविद्युत आयोजनामा १९ अर्ब ५४ करोड रुपैयाँ बराबरकाृ ऋण तथा सेयर लगानी स्वीकृत भई १० अर्ब ६९ करोड रुपैयाँ बराबरको लगानी रकम भुक्तानी गरिसकेको छ ।
यसका अतिरिक्त कम्पनीमा रणनीतिक साझेदारी, सरकारी क्षेत्र तथा नीजि क्षेत्रबाट अगाडि बढाइएका अध्ययन तथा निर्माणको विभिन्न चरणमा रहेका कुल ३११४ मेगावाट क्षमताका १३ वटा जलविद्युत आयोजनाहरूमा करिब ७० अर्ब रुपैयाँ बराबरको ऋण तथा सेयर लगानीका लागि प्रस्तावहरू प्राप्त भई अध्ययन तथा मूल्याकंन भइरहेको कम्पनीले जनाएको छ ।
सहायक कम्पनी रेमिट हाइड्रो लिमिटेडबाट निर्माण गरिने ७७.५ मेगावटको घुन्सा खोला र सिम्बुवा रेमिट हाइड्रो लिमिटेडबाट निर्माण गरिने ७०.३ मेगावटको सिम्बुवा खोला जलविद्युत आयोजनाहरुको विस्तृत अध्ययनको कार्य अन्तिम चरणमा रहेको छ । विद्युत खरिद विक्री सम्झौता सम्पन्न भए पश्चात सो आयोजनाहरूको निर्माणका लागि आवश्यक वित्तीय स्रोतको प्रवन्ध गरी निर्माण प्रकृया अघि बढाइने कम्पनीले जनाएको छ ।
