३४१ मेगावाटको बुढीगण्डकी आंशिकजलाशय ५ वर्षमा सम्पन्न गर्ने टाइम्स इनर्जीको लक्ष्य

काठमाडौं । टाइम्स इनर्जी प्रालिले ३४१ मेगावाटको बुढीगण्डकी आंशिक जलाशय जलविद्युत आयोजना निर्माण गर्ने भएको छ । कम्पनीले गोरखाको चुम नुब्री र धार्चे गाउँपालिका भएर बग्ने बुढीगण्डकी नदीमा आयोजनाको निर्माण प्रक्रिया अघि बढाएको हो ।

कम्पनीले आयोजनाको सम्भाव्यता अध्ययन सम्पन्न गरेको छ । अहिले निर्माण अघि बढाउन उत्पादन अनुमतिका लागि विद्युत विकास विभागमा आवेदन दिएको छ । विभागको आयोजनाको उत्पादन अनुमति कम्पनीको नाममा जारी गर्ने प्रक्रिया अन्तिम चरणमा पुर्याएको छ ।

विभागले कम्पनीको नाममा अनुमति जारी गर्नका लागि आयोजना प्रभावित स्थानीय, सरोकारवाला निकायहरू राय÷सुझाव माग गरेको छ । विभागले आयोजना निर्माण र सञ्चालन गर्दा कुनै प्रतिकूल असर पर्ने भए ३५ दिनभित्र लिखित राय/सुझाव पेस अनुरोध गरेको छ ।

प्रस्तावित आयोजना पिकिङ रन अफ दि रिभर प्रकृतिको आयोजना हो । यसको मुख्य संरचना बुढीगण्डकी नदीको दायाँ किनारामा रहने गरी डिजाइन तयार पारिएको कम्पनीले जनाएको छ । आयोजनाको दैनिक ५ घन्टाको दरले पिकिङ हुने गरी पोखरी निर्माण गरिनेछ । यसको डिजान बहाज १००.२७ घनमिटर प्रति सेकेण्ड र कुल हेड ३९८ मिटर रहनेछ ।

बुढीगण्डकी नदीमा बाँध बाँधी खोलाको दायापट्टि निर्माण हुने  इन्टेकबाट पानीलाई फर्काइ आयोजनाको मुख्य  संरचनाहरूः सेटलिङ बेसिन, हेडरेस टनेल, सर्ज साफ्ट, पेनस्टक पाइप हुँदै विद्युतगृहमा पुर्याउनेगरी डिजानइ तयार भएको छ । भूमिगत विद्युतगृहमा ५७ मेगावाटका ६ वटा भर्टिकल एक्सिस पेल्टोन टर्वाइनमार्फत विद्युत उत्पादन गरिनेछ ।

आयोजनाको सबै काम पूरा गरे २०८५ चैतदेखि व्यवसायिक उत्पादन गर्ने कम्पनीको लक्ष्य छ । आयोजना निर्माण पूरा भएपछि वार्षिक १८३७.१६ गिगावाट घन्टा विद्युत उत्पादन गर्न सक्छ । उत्पादित ऊर्जालाई करिब ४५ किमि प्रसारणलाइन निर्माण गरेर रातमाटे सबस्टेसनमा जोडिनेछ ।