डेढ महिनापछि सञ्चालनमा आउँदै इन्द्रावती तेस्रो, ३ करोड आम्दानी गुम्यो

काठमाडौं । उत्पादन बन्द भएको करिब डेढ महिनापछि सिन्धुपाल्चोकस्थित ७.५ मेगावाटको इन्द्रावाती तेस्रो जलविद्युत केन्द्र सञ्चालनमा आउने भएको छ । गत असार १ गते मेलम्ची नदीमा आएको भीषण बाढीका कारण विद्युत प्रवाह हुने प्रसारण लाइनमा क्षति पुगेपछि प्रणालीबाट बिच्छेद भएको विद्युत पुनः जोडिन लागेको हो ।

बाढी र पहिरोले बगाएको ६६ केभी प्रसारण लाइनको ५ वटा टावर पुनर्निर्माण गरी विद्युत उत्पादन सुचारु गर्न लागिएको प्रवर्द्धक नेशनल हाइड्रो पावर कम्पनीका अध्यक्ष कुमार पाण्डेले बताए । ‘बाढीले बगाएका प्रसारण लाइनको टावर निर्माण गरी तार तान्ने काम पनि सम्पन्न भइसकेको छ,’ उनले ऊर्जा खबरसँग भने, ‘अब उत्पादन सुरु गर्न सुरुङमा पानी भर्दैछौं।’

सुरुङ भरिएपछि सम्भव भएसम्म आज (बुधबार) रातिसम्ममा विद्युत उत्पादन सुचारु गर्ने तयारी भइरहेको पनि उनले बताए । कम्पनीले प्रसारण लाइन र जलविद्युत केन्द्रको बाँध क्षेत्रको संरचनामा क्षति भई उत्पादन बन्द हुँदा डेढ महिना अवधिमा विद्युत बिक्रीबाट हुने ३ करोड रुपैयाँ बढी आम्दानी गुमाएको छ ।

यो अवधिमा विद्युत बिक्रीबाट हुने आम्दानी गुम्नुका साथै प्रसारण लाइनको टावर निर्माण गर्दा थप ५० लाख रुपैयाँ खर्च भएको उनले बताए । बाँध क्षेत्रमा बाढीले भत्काएको संरचना निर्माण गर्दा पनि करिब ७० लाख रुपैयाँ खर्च भएको उनले बताए ।

बाँध क्षेत्रमा बाढीले भत्काएको आधा संरचना खोलामा पानीको सतह बढी भएकाले अहिले पुनर्निर्माण गर्न नसकिएको कम्पनीले जनाएको छ । हिउँदमा गरिने पुनर्निर्माणका लागि थप ४ करोड रुपैयाँ खर्च हुने अनुमान छ ।

बाढी र पहिरोले पुर्याएको क्षतिका कारण गत असार १ गतेदेखि नै जलविद्युतगृहको उत्पादन बन्द छ । प्रसारण लाइनको टावर पुनर्निर्माणका लागि नयाँ ठाउँ खोज्नु परेकाले उत्पादन सुचारु गर्न समय लागेको पाण्डेले बताए ।

‘बाढीले मेलम्ची नदीको पुल नै भत्काएकाले निर्माण सामाग्री ढुवानी गर्न समय लाग्यो । फेरि प्रसारण लाइनको टावर ठड्याउनका लागि पनि नयाँ ठाउँमा जग्गा खोज्नु पर्यो । यही कारणले उत्पादन सुरु गर्न समय लागेको हो’ उनले भने । इन्द्रावती तेस्रोको संरचनामा गत वर्षको बाढीले पनि क्षति पुर्याएको थियो ।