नियमन आयोगले विज्ञहरू समेटेर २२ सदस्यीय सल्लाहकार समिति गठन गर्‍याे

काठमाडौँ । विद्युत् नियमन आयोगले ऊर्जा, जलस्रोत, बैंकिङ, पुँजी बजार, वैदेशिक मामिला लगायत क्षेत्रका विज्ञहरूलाई समेटेर २२ सदस्यीय सल्लाहकार समिति गठन गरेको छ । आयोगको साउन १० गतेको २४१औं बैठकको निर्णय अनुसार संस्थाको काम–कारबाही तथा नीति निर्माण तहलाई थप प्रभावकारी बनाउने उद्देश्यअनुसार यस्तो निर्णय गरिएको हो ।

सल्लाहकार समितिमा पूर्वमन्त्रीदेखि राष्ट्रिय योजना आयोगका पूर्वसदस्य, पूर्वमुख्य सचिव, पूर्वसचिव, विश्वविद्यालयका प्राध्यापक, नेपाल विद्युत् प्राधिकरणका पूर्वकार्यकारी निर्देशक तथा पूर्व–उपकार्यकारी निर्देशक, पुँजी बजारविद्, निजी ऊर्जा तथा जलविद्युत् उद्यमी लगायत रहेका छन् । आयोगको काम–कारबाहीलाई थप सुदृढ तथा प्रभावकारी बनाई गुणस्तरीय तथा विश्वसनीयता कायम गर्ने प्रयोजनका निम्ति लब्ध–प्रतिष्ठित व्यक्तिहरूलाई अवैतनिक सल्लाहकारको रूपमा चयन गरिएको अध्यक्ष डा. रामप्रसाद धितालले जानकारी दिए ।

आयोगमा धितालको नेतृत्वमा नयाँ सदस्यहरूको नियुक्ति भएपछि उनले फरक ढाँचामा आयोगको काम–कारबाही अगाडि बढाउन थालेका छन् । अघिल्लो पदाधिकारीको काम तथा उपलब्धिको समीक्षा गर्दै त्यसलाई थप प्रभावकारी ढंगबाट अगाडि बढाउन आफू तत्पर रहेको उनले बताए ।

गत असार ७ गतेको मन्त्रिपरिषद्को निर्णयअनुसार आयोग अध्यक्षमा धिताल तथा सदस्यहरूमा डा. मधुसुधन अधिकारी र डा. झमकप्रसाद शर्मा नियुक्ति भएका हुन् । गौतम डंगोल सदस्यको जिम्मेवारीमै रहेका छन् भने एक जना महिला सदस्यको पद रिक्त रहेको छ ।

पद तथा गोपनीयताको शपथ लिएको एक महिनाभित्र (गत असार १० गते शपथ लिएका थिए) आयोगको ५ वर्षे मार्गचित्र निर्माण गरी सुझावका लागि विभिन्न निकायमा पठाइएको छ । यस्तै, यही अवधिमा समग्र क्षेत्रका विज्ञहरू समेटेर सल्लाहकार समिति गठन भएको छ । अब सक्दो चाँडो मार्गभित्रलाई अन्तिम रूप दिँदै नीतिगत विषयलाई कार्यान्वयन तहमा लैजाने अध्यक्ष धितालको भनाइ छ ।

सल्लाहकार समितिमा चयन भएका विज्ञहरूको नामावली

स्राेत : विद्युत् नियमन आयाेग