ऊर्जा खबर
काठमाडौं । आलम्पु जलविद्युत विकास कम्पनीले १० मेगावाटको माथिल्लो सागु जलविद्युत आयोजना निर्माण गर्ने भएको छ । कम्पनीले बागमती प्रदेशको दोलखा जिल्लामा पहिचान भएको आयोजना अघि बढाउन लागेको हो ।
अध्ययन पूरा भएको आयोजनाको उत्पादन अनुमतिपत्र लिने प्रक्रिया अन्तिम चरणमा पुगेको छ । विद्युत विकास विभागले कम्पनीलाई उत्पादन अनुमतिपत्र दिन ३५ दिने सूचना जारी गरेको छ ।
विभागका अनुसार वन तथा वातावरण मन्त्रालयबाट स्वीकृत वातावरणीय प्रभाव मूल्याङकन प्रतिवेदन र आयोजनाको अध्ययन रिपोर्टका आधारमा प्रवर्द्धक कम्पनीलाई उत्पादन अनुमतिपत्र दिने तयारी भइरहेको छ ।
विभागले अनुमतिपत्र जारी गर्नुअघि आयोजना निर्माण तथा सञ्चालन गर्दा पर्न सक्ने प्रतिकुल असरका बारेमा सम्बन्धित सरोकारवालासँग राय/सुझाव मागेको छ । विभागले सूचना जारी भएको मितिले ३५ दिनभित्र प्राप्त हुने गरी राय/सुझाव पठाउन सरोकारवाल समक्ष आग्रह गरेको छ ।
राय/सुझाव विभाग वा प्रवद्र्धक कम्पनीको कार्यालयमा प्राप्त हुने गरी पठाउन सक्ने विभागले जनाएको छ । आयोजनामा दुई वटा हेडवक्र्स निर्माण हुनेछ । मुख्य हेडवर्क खोलाको दायाँ र सहायक हेडवर्क कोथली खोलाको दायाँ किनारमा पर्दछ ।
बाँधबाट करिब १ हजार ४ सय २५ मिटर लामो हेडरेस पाइप र १ हजार ५ सय ३३ मिटर लामो पेनस्टक पाइपमार्फत पानीलाई विद्युतगृहमा पुर्याइन्छ । विद्युतगृहमा २ वटा टर्वाइन जडान हुनेछ । टर्वाइनमा जडान भएको जेनेरेटर मार्फत विद्युत उत्पादन गरिनेछ ।
आयोजनाबाट २०८४ असारभित्र विद्युत उत्पादन गरिनेछ । आयोजनाबाट वार्षिक ५६.८३ गिगावाट घन्टा विद्युत उत्पादन हुनेछ । उत्पादीत विद्युत ३३ केभी प्रसारण लाइन मार्फत १८ किलोमिटर दुरीमा रहेको नेपाल विद्युत प्राधिकरणको सिंगटी सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गर्नेछ ।
