ऊर्जा खबर
काठमाडौँ । गरिमा विकास बैंकको प्रमुख कार्यकारी अधिकृत (सिइओ) मा माधावप्रसाद उपाध्याय नियुक्त भएका छन् । बैंक सञ्चालक समितिको ३०४ औँ बैठकले बैंकका नायव प्रमुख कार्यकारी अधिकृत पदमा कार्यरत उपाध्यायलाई सिइओ नियुक्त गर्ने निर्णय गरेको हो । वैशाख १ गतेदेखि लागू हुनेगरी उपाध्यायलाई ४ वर्षका लागि सिइओ नियुक्त गर्ने निर्णय सञ्चालक समितिले गरेको हो ।
स्थापना कालदेखि नै बैंकको सेवामा प्रवेश गरेका उपाध्यायले व्यवस्थापनमा स्नातकोतर गरेका छन् । उनी १५ वर्षदेखि कम्पनी सचिव र ११ वर्षदेखि कार्यकारी अधिकृतका रुपमा बैंकमा सेवारत छन् । उनीसँग करिब १६ वर्षसम्म शिक्षण गरेको अनुभव समेत छ ।
बैंकमा विगत १५ वर्षदेखि निरन्तर प्रमुख कार्यकारी अधिकृतको जिम्मेवारी सम्मालदै आएका गोविन्दप्रसाद ढकालको कार्यकाल चैत अन्तिममा सकिएसँगै उपाध्यायलाई सञ्चालक समितिले कार्यकारी अधिकृत नियुक्त गर्ने निर्णय गरेको हो ।
चैत १४ गते बसेको उक्त सञ्चालक समितिको बैठकले सहायक प्रमुख कार्यकारी अधिकृत अनिल रेग्मीलाई चैत १५ गतेबाट लागु हुने गरी बैंकको कम्पनी सचिवमा नियुक्त गर्ने निर्णयसमेत गरेको छ ।
काठमाडौँ लाजिम्पाटमा केन्द्रीय कार्यालय रहेको गरिमा विकास बैंक लिमिटेडले काठमाडौँ उपत्यकाभित्र २२ सहित देशभर १२३ शाखा कार्यालय, १ एक्सटेन्सन काउण्टर र ५१ वटा एटीएम मार्फत ग्राहकहरूलाई वित्तीय सेवा प्रदान गर्दै आईरहेको छ ।
