ऊर्जा खबर
काठमाडौं । वैदेशिक रोजगारीमा गएका नेपाली नागरिकहरूले एसियन हाइड्रो पावर लिमिटेडको सेयर आवेदन दिने आज अन्तिम दिन हो । कम्पनीले वैदेशिक रोजगारीमा गएका नेपाली नागरिकका लागि मंसिर २७ गते देखि खुल्ला गरेको सेयर आवेदन अवधि आज साझ ५ बजेबाट सकिन लागेको हो ।
वैदेशिक रोजगारीमा गएका नेपाली नागरिकका लागि ८४ हजार कित्ता सेयर निष्कासन गरेको कम्पनीले जनाएको छ । कम्पनीका अनुसार सर्वसाधरणको लागि छुट्याएको जारी पुँजीको २४.७१ प्रतिशतले हुन आउने अर्थात ८ करोड ४० लाख रुपैयाँ बराबरको सय रुपैयाँ अंकित ८ लाख ४० हजार कित्ता सेयर मध्येको १० प्रतिशत सेयर निष्कासन गरेको हो ।
यस्तै, जारी पुँजी ३४ करोडको १० प्रतिशत हुन आउने अर्थात ३ करोड ४० लाख रकम बराबरको सय रुपैयाँ अंकित ३ लाख ४० हजार कित्ता साधारण सेयर स्थानीयको लागि निष्कासन गरिएको छ । ४० प्रतिशतले हुन आउने अर्थात १ लाख ३६ हजार कित्ता सेयर आयोजना प्रभावित क्षेत्र इलाम गाउँपालिका वडा नम्बर १० (साविकको गोदाक गाविसको १ देखि ९ सम्मका सम्पूर्ण वडाहरु), माई जोगमाई गाउँपालिका वडा नम्बर ३ र ४ (साविकको नाम्सालिङ्ग गाविसको १ देखि ९ सम्मको सम्पूर्ण वडाहरु तथा नयाँबजार गाविसको वडा नम्बर ५), सुर्योदय नगरपालिका वडा नम्बर ११ (साविकको माघेसुन्तले र तिनघरे गाविसका सम्पुर्ण वडाहरु तथा सुर्योदय गाविसको वडा नम्बर ३, ४ र ५ का स्थानीयका लागि निष्कासन गरिएको हो ।
साथै, ६० प्रतिशतले हुन आउने अर्थात २ लाख ४ हजार कित्ता सेयर आयोजनको अति प्रभावित क्षेत्र बाहेकको इलाम जिल्लाका अन्य क्षेत्रका बासिन्दाहरुका लागि निष्कासन गरिएको छ ।
स्थानीयले तथा वैदेशिक रोजगारीमा रहेको नेपाली नागरिकले न्यूनत्तम १० कित्ता देखि अधित्तम २० हजार कित्ता सम्म आवेदन दिन पाउँनेछन् । स्थानीयले पुस २७ गते सम्म आवेदन दिन सक्नेछन् ।
कम्पनीको सेयर निष्कासन गरी बाँडफाँड गर्न एनएबि क्यापिटल लिमिटेडलाई बिक्री प्रबन्धक तोकिएको छ । इलाममा ६.२ मेगावाटको तल्लो जोगमाई जलविद्युत आयोजना सञ्चालनमा छन् ।
