ऊर्जा खबर
काठमाडौं । एक करोड ६ लाख कित्ता बढी साधारण सेयर निष्कासन गर्न दुई जलविद्युत कम्पनीले नेपाल धितोपत्र बोर्डबाट अनुमति पाएका छन् । कम्पनीले आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन अनुमति पाएका हुन् ।
मकर जितुमाया सुरी हाइड्रो पावर लिमिटेड र सानिमा मिडील तमोर हाइड्रो पावर लिमिटेडले १ करोड ६ लाख ११ हजार २ सय ५० कित्ता सेयर निष्कासन गर्न पुस ७ गते अनुमति पाएका छन् । बोर्डका अनुसार यी कम्पनीले क्रमशः २२ लाख ८० हजार कित्ता र ८३ लाख ३१ हजार २ सय ५० कित्ता साधारण सेयर निष्कासन अनुमति पाएका हुन् ।
लमजुङमा ७३ मेगावाटको मध्य तमोर निर्माण गरिरहेको सानिमा तमोरले स्थानीय र सर्वसाधारणको लागि सेयर निष्कासन गर्न लागेको छ । कम्पनीको सेयर सानिमा क्यापिटल लिमिटेडले निष्कासन गरी बाँडफाँड गर्नेछ ।
मकर जितुमायाले दोलखामा सञ्चालनमा रहेको ७ मेगावाटको माथिल्लो सुरीको प्रभावित स्थानीय र सर्वसाधारणका लागि सेयर निष्कासन अनुमति पाएको हो । कम्पनीका अनुसार निष्कासनको तयारी गरेको सेयरमध्ये ७ लाख ६० हजार कित्ता स्थानीयका लागि र बाँकी१५ लाख २० हजार कित्ता सर्वसाधारणका लागि छुट्याएको छ । कम्पनीको सेयर प्रभु क्यापिटल लिमिटेडले बिक्री तथा बाँडफाँड गर्नेछ ।
