ऊर्जा खबर
काठमाडौं । मोदी इनर्जी लिमिटेडले साढे ७२ लाख कित्ता साधारण सेयर निष्कासन गर्ने भएको छ । कम्पनीले आयोजना प्रभावित स्थानीय र सर्वसाधारणका लागि छुट्याएको सेयर निष्कासन गर्न लागेको हो ।
सय रुपैयाँ अंकित ७२ करोड ५० लाख बराबरको ७२ लाख ५० हजार कित्ता सेयर निष्कासन गर्न लागेको कम्पनीले जनाएको छ । कम्पनीका अनुसार सेयर निष्कासन अनुमतिका लागि नेपाल धितोपत्र बोर्डमा आवेदन दिइएको छ ।
बोर्डबाट अनुमति पाउने लगतै सेयर निष्कासन गरी बाँडफाँड गरिनेछ । पहिलो चरणमा आयोजना प्रभावित स्थानीयका लागि र दोस्रो चरणमा सर्वसाधारणका लागि सेयर निष्कासन गरी बाँडफाँड गरिनेछ । कम्पनीको सेयर निष्कासन गरी बाँडफाँड गर्न सनराइज क्यापिटल लिमिटेडलाई बिक्री प्रबान्धक तोकिएको छ । कम्पनीको पर्वतमा निर्माण सम्पन्न गरेकाे २० मेगावाटको तल्लो मोदी खोला जलविद्युत आयोजना सञ्चालनमा छन् ।
यस्तै, मेन्छियाम हाइड्रो पावर लिमिटेडले पनि १६ लाख २७ हजार ७ सय ५० कित्ता सेयर निष्कासन गर्न बोर्डमा आवेदन दिइएको छ । कम्पनीले आयोजना प्रभावित स्थानीय र सर्वसाधारणका लागि छुट्याएको सेयर निष्कासन अनुमतिका लागि बोर्डमा आवेदन दिएका हो ।
बोर्डबाट अनुमति पाउने लगतै पहिलो चरणमा आयोजना प्रभावित स्थानीयका लागि र दोस्रो चरणमा सर्वसाधारणका लागि सेयर निष्कासन गरी बाँडफाँड गरिनेछ । कम्पनीको सेयर निष्कासन गरी बाँडफाँड गर्न एनआइसी एसिया क्यापिटललाई बिक्री प्रबन्धक तोकिएको छ ।
.jpg)
